Home ՀԱՅԱՍՏԱՆԱՐՑԱԽ «Արցախի Պաշտօնեաները Պէտք Է Այցելեն Երեւան Եւ Իրենց Յուզող Հարցերը Վարչապետին Տան Փակ Ձեւաչափով»․ Քաղաքագէտ

«Արցախի Պաշտօնեաները Պէտք Է Այցելեն Երեւան Եւ Իրենց Յուզող Հարցերը Վարչապետին Տան Փակ Ձեւաչափով»․ Քաղաքագէտ

by MassisPost

«Պարզ տրամաբանութիւնն է յուշում, որ երբ ՀՀ-ի վարչապետն անում է յայտարարութիւն, որը ինչ-որ հարցեր է յարուցում Ստեփանակերտում, ապա դրան պէտք է հետեւի մի պարզ քայլ` Արցախի բարձրագոյն պաշտօնեաները պէտք է այցելեն Երեւան եւ այդ հարցերը վարչապետի հետ հանդիպմանը փակ ձեւաչափով նրան տան: Ես վստահ եմ, որ նրանք կը ստանան պատշաճ եւ բաւարարող պատասխաններ, այլ ոչ թէ հարցը հանել դուրս, անել աւելորդ եւ վնասակար յայտարարութիւններ, որոնք առաջին հերթին թուլացնում են հէնց Ստեփանակերտի դիրքերը», արձագանգեց քաղաքագէտ Ռուբէն Մեհրապեանը` անդրադառնալով Արցախէն հնչած յայտարարութիւններուն:

Շարունակելով` Մեհրապեանը շեշտեց, որ իր նշած  պարզ տրամաբանութիւնը «հասու չէ Արցախի ղեկավարութեան շատ որոշակի հատուածի, որոնք խելքներին զօռ տալու փոխարէն` լեզուներին են զօռ տալիս»: «Յամենայնդէպս, ինձ թոյլ է տալիս նման պնդում անել հրապարակային յայտարարութիւնների այն տարափը, որը գալիս է Ստեփանակերտից, տարբեր մակարդակներից, յայտարարութիւններ, որոնք չեն դիմանում որեւէ քննութեան», նշեց ան:

«Երբ որ 1998-ից  Արցախը դուրս բերուեց բանակցային ձեւաչափից, նշաձողի վերաբերեալ որեւէ խօսակցութիւն չեղաւ, երբ փաստացի իջեցուեց Արցախի մասնակցութեան նշաձողը` անուղղելի վնաս հասցնելով Արցախի բանակցային դիրքերին: Երբ Մեղրիի հաշուին «պազարներ» էին  գնում, էդ ժամանակ եւս որեւէ նշաձողի իջեցման մասին որեւէ մէկը ոչ միայն չէր խօսում, այլեւ նոյնիսկ չէր էլ զկռտում, առաջին հերթին` հէնց Արցախից, որովհետեւ լաւ կուշտ վիճակ էր մօտները: Հիմա այս խօսակցութիւնները նշաձողի վերաբերեալ ուղղակի տարօրինակ են: Փաշինեանն ասում է` միջազգային հանրութիւնն է մեզնից ակնկալում  նշաձողի իջեցում:  Կը ներէք` իսկ այդ ի՞նչ նորութիւն է ասում վարչապետը, նորութիւն չկայ իր ասածում:  Այդ` «նշաձողի» մասին նախադասութեանը յաջորդող նախադասութիւնն էլ, բարի եղէք, ականջներդ բացէք եւ լսէք, թէ ինչ է նշանակում. դա նշանակում է, որ մենք առաջին հերթին պէտք է կեդրոնանանք անվտանգութեան եւ իրաւունքների վրայ, եւ դրանից բխեցուի կարգավիճակի հարցը, այլ ոչ թէ արուի հակառակը: Այսինքն` այս հարցերը թողած, չպէտք է կառչած մնանք կարգավիճակի գերխնդրին` չբացատրելով, թէ ինչի համար է եւ ինչի մասին է այն: Այ սրա՛ մասին է խօսքը: Ես ուզում եմ մի զուգահեռ էլ անցկացնել. միջազգային կոնիւնկտուրայի փոփոխութիւն է տեղի ունենում երեք տասնամեակի ընթացքում, եւ ՀՀ դիւանագիտութիւնը կը պատշաճեցուէր այդ փոփոխութիւններին, որովհետեւ դա է միակ հնարաւոր տարբերակը: Մինչեւ ԽՍՀՄ-ի փլուզումը «միացում» կարգախօսն էր գերիշխում, հարցը պէտք է լուծէր Մոսկուան` որպէս մի մեծ  երկրի ներքին հարց, այսինքն` ուղղէր իր կատարած պատմական անարդարութիւնը: Բայց երբ ԽՍՀՄ-ը փլուզուեց, հարցը դարձաւ միջպետական հարց, եւ բնական էր, որ այս իրավիճակում հայկական դիւանագիտութիւնը պէտք է պատշաճեցնէր իր նշաձողերը եւ, այո՛, հարցը տեղափոխէր ազգերի ինքնորոշման հարթութիւն: Եւ, բացի այս, միջազգայնացնէր հարցի կարգաւորումը, եւ հէնց դրա համար էլ ստեղծուեց ԵԱՀԿ Մինսքի Խումբը: Ինչ է սա նշանակում` այն, ինչ ասում էինք ինչ-որ մի ժամանակ առաջ առկայ կոնիւնկտուրայի պարագայում, այսօր առկայ մէկ այլ կոնիւնկտուրայի պարագայում չենք կարող  մեր ասելիքը թողնել  նոյնը:  Եթէ այսքանը  հասկանալու համար յաւելեալ բացատրութիւններ են պահանջւում, ապա, բարի եղէք, եկէք Երեւան, հանդիպէք ՀՀ ղեկավարութեան հետ եւ տուէք Ձեր հարցերն ու ստացէք դրանց պատասխանները: Ոչ թէ աջ ու ձախ շաղ տուէք ձեր առկայծող մտքերը», աւելցուց քաղաքագէտ Ռուբէն Մեհրապեանը:

Հարակից Նյութեր

Leave a Comment