Ազգային Ժողովի «Քաղաքացիական Պայմանագիր խմբակցութեան պատգամաւոր Էտուարտ Աղաճանեանը, Ապրիլ 15-ին, խորհրդարանական ճեպազրոյցի ժամանակ յայտնեց, որ Արցախի գործընկերները հաւանաբար լաւ չեն հասկցած վարչապետ Փաշինեանի ելոյթին բովանդակութիւնը, հակառակ պարագային ինքը որեւէ բացատրութիւն չի կրնար գտնել Արցախի Ազգային Ժողովի ընդունած յայտարարութեան հիմքին մէջ:
«Ես կրկնում եմ, որ որեւէ գործընթաց արցախցիների թիկունքում ուղղակի չի կարող լինել: Այս ամբողջ գործընթացը միտուած է հէնց արցախահայութեան իրաւունքների պաշտպանութեանը եւ դրանց իրացմանը: Ձեր թոյլտուութեամբ ուզում եմ մեկնաբանել նաեւ վարչապետի ելոյթից մի հատուած, որը վերաբերում էր հակառակ տրամաբանութեանը, երբ առաջարկւում էր հարցին նայել առաջնահերթ արցախցիների իրաւունքների իրացմանը` յետոյ կարգավիճակին: Ես կարծում եմ, որ այս հարցում Հայաստանի համար Արցախի հիմնախնդիրը երբեւէ տարածքային վէճ չի եղել, այլ` արցախահայութեան իրենց ծննդավայրում անվտանգ ապրելու խնդիր: Հետեւաբար` մեզ համար կարգավիճակի հարցը եղել է միջոց այս իրաւունքները իրացնելու համար: Ես կարծում եմ, որ այստեղ որեւէ նորութիւն չկայ եւ Հայաստանի դիրքորոշումը այս հարցում մշտապէս եղել է անփոփոխ», ըսաւ Էտուարտ Աղաճանեանը:
Անդրադառնալով վարչապետ Փաշինեանի այն յայտարարութեան, թէ պէտք է իջեցնել Արցախի կարգավիճակին համար «մեր» սահմանած նշաձողը` պատգամաւորը ըսաւ, որ խօսքը այն նշաձողի մասին է, որու շնորհիւ պիտի ապահովուի Հայաստանի շուրջ միջազգային հանրութեան այնպիսի ամրութիւն, որու շնորհիւ հայանպաստ լուծումը պիտի դառնայ աւելի հաւանական:
«Մենք ունենք 30 տարուայ բանակցային փորձ, որի ընթացքում ունեցել ենք որոշակի նշաձող, նաեւ դրանով պայմանաւորուած Հայաստանը այդ 30 տարիների ընթացքում եղել է դիւանագիտական մեկուսացման մէջ, որի հետեւանքները, կարծում եմ, բոլորս տեսանք նաեւ 44-օրեայ պատերազմի ընթացքում եւ դրանից յետոյ: Ժամանակն է հետեւութիւն անել մեր սխալներից եւ շարժուել իրատեսական նկատառումներով: Այդ իրատեսական նկատառումներով է պայմանաւորուած, որ Հայաստանի իշխանութիւնները կարեւոր են համարում միջազգային հանրութեան հետ նոյն մակարդակի վրայ լինելը` Արցախի հարցում, որովհետեւ սա չափազանց կարեւոր պայման է, որպէսզի այս լուծուի առաւել հայանպաստ ձեւով», ըսաւ ան: