Տեղի ունեցած է Հայաստանի վարչապետ Նիկոլ Փաշինեանի հեռախօսազրոյցը Ռուսաստանի Դաշնութեան նախագահ Վլատիմիր Փութինի հետ:
Նիկոլ Փաշինեան Ռուսաստանի նախագահին տեղեկացուցած է Ապրիլ 6-ին Եւրոպական Խորհուրդի նախագահ Շարլ Միշէլի միջնորդութեամբ Ատրպէյճանի նախագահ Իլհամ Ալիեւի հետ ունեցած հանդիպման արդիւնքներուն մասին:
Զրուցակիցները կարեւորած են Ատրպէյճանի հետ խաղաղութեան պայմանագրի ստորագրման եւ սահմանազատման աշխատանքներու մեկնարկին մասին պայմանաւորուածութիւնները:
Ռուսաստանի Դաշնութեան նախագահը պատրաստակամութիւն յայտնած է լիարժէք աջակցելու նշուած գործընթացներուն: Անդրադարձ կատարուած է Լեռնային Ղարաբաղի մէջ Ռուսաստանի խաղաղապահ զօրախումբի պատասխանատուութեան գօտի ատրպէյճանական ստորաբաժանումներու ներխուժման:
Վարչապետ Փաշինեանը արտայայտած է հայկական կողմին ակնկալիքը, որ ռուս խաղաղապահները յստակ միջոցներու ձեռնարկեն ներխուժած ատրպէյճանական ստորաբաժանումներու դուրսբերումը ապահովելու համար:
Հայաստանի վարչապետը եւ Ռուսաստանի նախագահը անդրադարձած են նաեւ երկու երկիրներու տնտեսական փոխգործակցութեան հարցերուն ու պայմանաւորուած են, որ նաեւ այս հարցերը մանրամասն պիտի քննարկեն Ապրիլ 19-ին Նիկոլ Փաշինեանի` Ռուսաստանի Դաշնութիւն կատարելիք պաշտօնական այցի ընթացքին: