ԵԱՀԿ գործող նախագահ, Լեհաստանի արտաքին գործերու նախարար Զպիկնեւ Ռաուի` Հայաստան կատարած այցին հիմնական նպատակն էր ըմբռնել Լեռնային Ղարաբաղի հակամարտութեան եւ անվտանգութեան հարցերուն վերաբերեալ Հայաստանի դիրքորոշումը: Այս մասին լրագրողներու հետ հանդիպման ընթացքին ըսաւ Հայաստանի մէջ Լեհաստանի արտակարգ եւ լիազօր դեսպան Փաւել Չեփլաքը:
«Գլխաւոր նպատակը եղած էր ըմբռնել Հայաստանի դիրքորոշումը` Լեռնային Ղարաբաղի հակամարտութեան եւ անվտանգութեան հարցերուն հետ կապուած: Նախարար Ռաու փոխանցած է մեր կարծիքներն ու առաջարկները, որոնք մօտակայ օրերուն պիտի դիտարկուին Հայաստանի կառավարութեան կողմէ», յաւելած է ան:
Զպիկնեւ Ռաու Մարտ 29-էն Ապրիլ 1 այցելած է Հայաստան, Վրաստան եւ Ատրպէյճան, ինչ որ, ըստ դեսպանին, կը փաստէ, որ Լեհաստանը կը կարեւորէ Հարաւային Կովկասի երկիրներուն հետ համագործակցութիւնը: Ծրագիրը բոլոր երեք երկիրներուն մէջ նոյնը եղած է: Հայաստանի մէջ հանդիպումներ կայացած են ՀՀ նախագահին, վարչապետին եւ արտաքին գործերու նախարարին հետ: Ըստ դեսպանին` իւրայատուկ հանդիպում եղած է նաեւ Լեռնային Ղարաբաղի մարդու իրաւունքներու պաշտպանին հետ:
«Սա կարեւոր այց էր, քանի որ վերջին անգամ նման բարձրաստիճան այց կայացած էր 2017 թուականի աշնան: Ի հարկէ, փոխայցելութիւն կատարելու հրաւէր ստացած է արտաքին գործերու նախարար Արարատ Միրզոյանը», յաւելեց ան:
Անոր խօսքով` Հայաստանի վարչապետ Նիկոլ Փաշինեանը վճռական տրամադրուած է` լսելու Ռաուի առաջարկները, եւ Փաշինեանը ստացած է յստակ պատասխաններ: Դեսպանը նաեւ նշեց, որ Լեհաստանի գլխաւոր նպատակը համագործակցութեան վերականգնումն է ԵԱՀԿ Մինսքի խմբակի համանախագահներուն միջեւ:
«Վարշաւան իր հնարաւորութիւններու սահմաններուն մէջ կատարեց ամէն ինչ, այս տարուայ Փետրուարին Լեհաստանի արտաքին գործերու նախարարը ընդունեց ԵԱՀԿ Մինսքի խմբակի երեք համանախագահները, սակայն Ուքրանիոյ մէջ պատերազմը փոխեց իրավիճակը», ըսաւ ան: