Արտաքին գործերու նախարար Արարատ Միրզոյեան եւ ԵԱՀԿ Մինսքի Խմբակի Ռուսաստանի համանախագահ Իկոր Խովաեւ քննարկած են Լեռնային Ղարաբաղի շփման գիծի խախտման եւ խաղաղապահ զօրախումբի պատասխանատուութեան գօտիին մէջ` Փառուխ գիւղի հատուածին մէջ, Մարտ 24-ին մեկնարկած ատրպէյճանական ներխուժման հետեւանքով ստեղծուած իրավիճակը: Այս մասին կը յայտնէ հայկական կողմը:
Անդրադառնալով Արցախի մէջ մարդասիրական ճգնաժամ ստեղծելու, քաղաքացիական բնակչութիւնը թիրախաւորելու եւ ցեղային զտման ուղղուած ատրպէյճանական կողմի այլ գործողութիւններուն, ընդգծուած է ատրպէյճանական զինուած ուժերու ստորաբաժանումներու` Մարտ 23-ի ելման դիրքեր վերադարձի անհրաժեշտութիւնը, կը հաղորդէ Հայաստանի Արտաքին Գործերու Նախարարութիւնը:
Նախարար Միրզոյեան ներկայացուցած է հայկական կողմին դիրքորոշումը ԵԱՀԿ Մինսքի Խմբակի համանախագահութեան շրջանակներուն մէջ խաղաղութեան պայմանագրին շուրջ Հայաստանի եւ Ատրպէյճանի միջեւ բանակցութիւններ սկսելու վերաբերեալ: Վերահաստատուած է ԵԱՀԿ Մինսքի Խմբակի համանախագահութեան լիարժէք աշխատանքներուն կարեւորութիւնը:
Բանակցութիւններուն վերաբերեալ հայկական կողմի առաջարկներուն Մինսքի Խմբակէն տակաւին արձագանգ չէ եղած:
