Ատրպէյճանը միտումնաւոր կերպով կը խաթարէ Լեռնային Ղարաբաղի մէջ կենսական նշանակութիւն ունեցող ենթակառուցուածքներու բնականոն աշխատանքը, ինչ որ ակնյայտօրէն կը յանգեցնէ Լեռնային Ղարաբաղի մէջ մարդասիրական ճգնաժամի ստեղծման, կը յայտարարէ պաշտօնական Երեւանը:
«Անթոյլատրելի ենք համարում արցախահայութեան նկատմամբ կանոնաւոր բռնութեան այս աղաղակող քաղաքականութիւնը: Ստեղծուած իրավիճակը հրատապ է դարձնում մարդասիրական ճգնաժամի կանխման նպատակով միջազգային հանրութեան յստակ արձագանգը, ինչպէս նաեւ միջազգային մարդասիրական կառոյցների անյապաղ եւ անխոչընդոտ ներգրաւուածութիւնը Լեռնային Ղարաբաղում», ըսուած է Արտաքին Գործերու Նախարարութեան յայտարարութեան մէջ:
Շուշի քաղաքի մօտակայքին` ատրպէյճանական վերահսկողութեան տակ գտնուող տարածքին մէջ, կրկին խափանուած է Հայաստանէն բնական կազի մատակարարումը Լեռնային Ղարաբաղ: Ցրտաշունչ եղանակային պայմաններու մէջ Լեռնային Ղարաբաղի շուրջ 120 հազար բնակչութիւնը զրկուած է կենսական անհրաժեշտ կազամատակարարումէն, կը յիշեցնէ արտաքին քաղաքական գերատեսչութիւնը:
Արցախի Արտաքին Գործերու Նախարարութիւնը, իր հերթին, կը յայտարարէ, որ «Ատրպէյճանի պահուածքը մարդասիրական ահաբեկչութիւն է»:
«Այն կոպտօրէն խախտում է միջազգային մարդասիրական եւ միջազգային իրաւունքի կանոններն ու սկզբունքները, որեւէ ձեւով չի տեղաւորւում բարոյականութեան շրջանակներում: Այդ ստոր արարքը ատելութեան եւ ազգայնամոլութեան հերթական դրսեւորում է», կը շեշտէ կառոյցը: