Ռուսաստանի արտաքին գործերու նախարար Սերկէյ Լաւրով հեռախօսազրոյցներ ունեցած է Հայաստանի ու Ատրպէյճանի իր երկու գործընկերներուն` Արարատ Միրզոյեանի եւ Ճէյհուն Պայրամովի հետ:
Ռուսաստանի Արտաքին Գործերու Նախարարութեան փոխանցմամբ` հեռախօսազրոյցներու ընթացքին քննարկուած է Ատրպէյճանի եւ Հայաստանի միջեւ խաղաղութեան պայմանագրի կնքման հարցը:
Արարատ Միրզոյեան, ըստ հայկական արտաքին քաղաքական գերատեսչութեան, ռուս գործընկերոջ ներկայացուցած է հայկական կողմի դիրքորոշումը Հայաստանի եւ Ատրպէյճանի միջեւ խաղաղութեան պայմանագրի շուրջ բանակցութիւններ սկսելու վերաբերեալ, կը յայտնէ Հայաստանի Արտաքին Գործերու Նախարարութիւնը:
Ռուսաստանի Արտաքին Գործերու Նախարարութեան փոխանցմամբ` Լաւրով Միրզոյեանի ու Պայրամովի հետ հեռախօսազրոյցներուն ընթացքին անդրադարձած է նաեւ 2020 թուականի Նոյեմբեր 9-ի, 2021 թուականի Յունուար 11-ի եւ Նոյեմբեր 26-ի եռակողմ յայտարարութիւններով ձեռք բերուած պայմանաւորուածութիւններու կատարման ընթացքին:
Միրզոյեան, Լաւրովի հետ հեռախօսազրոյցին, ըստ Հայաստանի Արտաքին Գործերու Նախարարութեան, ներկայացուցած է նաեւ Հայաստան-Ատրպէյճան սահմանագօտիին եւ Լեռնային Ղարաբաղի մէջ «Ատրպէյճանի կողմից սադրանքների եւ հրադադարի խախտումների հետեւանքով ստեղծուած իրավիճակը»: Հեռախօսազրոյցին ընթացքին անդրադարձ կատարուած է Հայաստան-Թուրքիա յարաբերութիւններու կարգաւորման գործընթացին: Միտքեր փոխանակուած են տարածաշրջանային ու միջազգային անվտանգութեան վերաբերող հարցերու շուրջ:
Միրզոյեան ու Լաւրով քննարկած են Հայաստանի ու Ռուսաստանի միջեւ դիւանագիտական յարաբերութիւններու հաստատման 30-ամեակին նուիրուած միջոցառումներուն վերաբերող հարցեր:
Ռուսական արտաքին քաղաքական գերատեսչութեան փոխանցմամբ` զրուցակիցները գոհունակութեամբ նշած են ՀԱՊԿ, ԵԱՏՄ, ԱՊՀ, ինչպէս նաեւ միջազգային հարթակներու մէջ Մոսկուայի եւ Երեւանի փոխգործակցութեան բարձր մակարդակը:
Ատրպէյճանի արտաքին գործերու նախարարին հետ հեռախօսազրոյցին ընթացքին, Ռուսաստանի Արտաքին Գործերու Նախարարութեան հաղորդագրութեան համաձայն, քննարկուած է նաեւ Մարտ 22-ին նախագահներ Վլատիմիր Փութինի եւ Իլհամ Ալիեւի ստորագրած Դաշնակցային փոխգործողութեան մասին հռչակագրի դրոյթներու կեանքի կոչման եւ երկկողմ յարաբերութիւններու այլ հարցերու լայն շրջանակ, ինչպէս նաեւ «ժամացոյցներու ճշդում» տեղի ունեցած է «3+3» Տարածաշրջանային Խորհրդակցական Հարթակի հետագայ աշխատանքին շուրջ: Լաւրով եւ Պայրամով անդրադարձած են նաեւ Ուքրանիոյ շուրջ իրավիճակին:
