Արցախի վնասուած կազատար խողովակի վերանորոգման աշխատանքները աւարտած են, կը յայտնեն տեղեկատուական շտաբէն:
Հաշուի առնելով կազատարի` 10 օր շարունակ չգործելու հանգամանքը, այժմ կ’իրականացուին թեքնիք բնոյթի շարք մը աշխատանքներ կազի պատշաճ եւ անխափան փոխադրումն ու մատուցումը բաշխիչ ցանցերուն ապահովելու ուղղութեամբ: Նշուած աշխատանքները աւարտելէ յետոյ կազամատակարարումը պիտի վերականգնուի, կը հաղորդեն շտաբէն:
Արցախի ամբողջ տարածքին 11 օր կազ չկար, կազատարի արկածը Ատրպէյճանի հսկողութեան տակ գտնուող տեղանքին մէջ է` Շուշիի մօտ: Ատրպէյճանական կողմը օրեր շարունակ թոյլ չէր տար մտնել արկածին վայրը ու վերանորոգել խողովակը: Կազի բացակայութիւնը բազմաթիւ խնդիրներ ստեղծած է` հացի արտադրութենէն, ջեռուցումէն մինչեւ ծանրաբեռնուածութեան պատճառով հոսանքի պարբերական անջատումներ:
