Արժոյթի Միջազգային Հիմնադրամը (ԱՄՀ) եւս կտրուկ նուազեցուցած է Հայաստանի տնտեսական աճի կանխատեսումը` նախկին 4.5-5 տոկոսի փոխարէն 1.5 տոկոս:
Միջազգային մեծ ֆինանսական կառոյցը կ’ընդգծէ, որ Ռուսաստանի նկատմամբ լայն պատժամիջոցները անխուսափելիրեն պիտի ազդեն Հայաստանի տնտեսութեան վրայ, բացասական ազդեցութեան չափը տակաւին անորոշ է:
Արժոյթի Միջազգային Հիմնադրամին գնահատմամբ` ռուս-ուքրանական պատերազմին պատճառով սննդամթերքի ու վառելանիւթի բարձրացած գիները, կրճատուած դրամական փոխանցումները, համաշխարհային ֆինանսական շուկային մէջ տատանողականութեան աճը Հայաստանի մէջ աւելի մեծ թանկացումներու եւ տնտեսութեան աճի դանդաղեցման պիտի յանգեցնեն:
Այն, որ Հայաստանը պիտի տուժէ Ռուսաստանի դէմ օրէ օր խստացուող պատժամիջոցներէն, չեն թաքցներ նաեւ իշխանութիւնները: Կեդրոնական Դրամատունը օրերս նուազեցուց տնտեսական աճի իր կանխատեսումը` 5.3-ի փոխարէն ընդամէնը 1.6 տոկոս: Գլխաւոր դրամատան նախագահ Մարթին Գալստեանն ալ յայտնեց, որ համատարած անորոշութիւն է, բայց պարզ է, որ Հայաստանի գլխաւոր առեւտրային գործընկեր Ռուսաստանի դէմ պատժամիջոցները զգալիօրէն պիտի դանդաղեցնեն տնտեսութեան աճը, պիտի հարուածեն անոր ճիւղերուն:
«Տեսնում ենք, որ կան որոշակի խնդիրներ հանքարդիւնաբերութիւնում, մշակուող արդիւնաբերութիւնում, արդիւնաբերութեան ճիւղի 94.7 տոկոս աճ է դրուած, որոշակի նուազում կայ նաեւ շինարարութեան ճիւղում: Միակը, որը որոշակի աւելի դրական զարգացում է ունենալու` մեր նախկին կանխատեսումների համաձայն, գիւղատնտեսութեան ճիւղն է», ըսած էր Կեդրոնական Դրամատան նախագահը:
Անցեալ շաբաթ Կեդրոնական Դրամատունը որոշեց 1.25 տոկոսով բարձրացնել գնաճը զսպող գործիքը` վերաֆինանսաւորման տոկոսադրոյքը` զայն սահմանելով 9.25 տոկոս: Վերաֆինանսաւորման տոկոսադրոյքի այսպիսի խստացումները, ըստ Կեդրոնական Դրամատան, պիտի նպաստեն 12-ամսեայ գնաճի նուազման, այն պիտի մօտենայ թիրախային 4 տոկոս ցուցանիշին: Փետրուարին 12-ամսեայ գնաճը 6.5 տոկոս կազմած է, ամբողջ 2021 թուականին` 7.7 տոկոս: Այժմ յատկապէս արագ կը բարձրանան սննդամթերքի գiները:
«Դեռ պարզ չէ` Ռուսաստանի դէմ պատժամիջոցների պատճառով Հայաստանն ինչ ծաւալի ցնցումի պիտi ենթարկուի»:
Տնտեսագիտական համալսարանի «Ամբերդ» Հետազօտական Կեդրոնի փորձագէտ Նարեկ Կարապետեան կ’ընդգծէ, որ տնտեսական այսպիսի կանխատեսումները այժմ շատ մեծ անորոշութեան պայմաններու մէջ կը կատարուին: Ըստ անոր դեռ պարզ չէ, թէ Ռուսաստանի դէմ պատժամիջոցներու պատճառով Հայաստանը ինչ ծաւալի ցնցումի պիտի ենթարկուի. «Այս կանխատեսումները, ինչպէս վերեւի ուղղութեամբ կարող են ճշգրտուել ինչ-ինչ պատճառներով, այնպէս էլ ներքեւի ուղղութեամբ, եթէ այս ցնցումը շատ աւելին լինի: Դա շատ պայմանական կանխատեսում է, ընդամէնը ուղեգծում է այս պահին առկայ տեղեկութիւնը»:
2021-ի աւարտին, մինչ ռուս-ուքրանական հակամարտութեան գործուն փուլը, Հայաստանի իշխանութիւնները 2022-ի համար 7 տոկոս տնտեսական աճ կը կանխատեսէին, այս ցուցանիշը ամրագրուած է կառավարութեան հնգամեայ ծրագրին մէջ: Ըստ իշխանութիւններուն, տարեկան նուազագոյնը 7 տոկոս տնտեսական աճ պէտք է թիրախային շարք մը ընկերային խնդիրներ լուծելու եւ մարդոց կեանքը բարելաւելու համար:
