Շաբաթներէ ի վեր երկարող ռուս-ուքրանական պատերազմի հանգամանքով պայմանաւորուած` աւելցած է Ռուսաստանէն եւ Ուքրանիայէն ՀՀ եկող զբօսաշրջիկներու հոսքը, որոնք նաեւ կը դիմեն ՀՀ պատկան մարմիններուն` ՀՀ քաղաքացիութեան եւ կացութեան հետ կապուած խնդիրներով: Փետրուար 24-ի ռազմական գործողութեան մեկնարկէն ի վեր, ՀՀ ոստիկանութեան Անձնագրային եւ Վիզաներու Վարչութեան պետ Արա Մկրտչեանի տեղեկացմամբ, ՀՀ իշխանութիւնները Ռուսաստանի եւ Ուքրանիոյ քաղաքացիներէն ընդհանուր առմամբ 355 դիմում ստացած են ՀՀ քաղաքացիութիւն ստանալու հարցով: Դիմում ներկայացուցած անձերէն 349-ը Ռուսաստանի քաղաքացիներ են, 6-ը` Ուքրանիոյ, անոնց գերակշիռ մասը ազգութեամբ հայեր են: Պաշտօնեային փոխանցմամբ` ներկայ պահուն ՀՀ քաղաքացիութիւն ստանալու կամ նախապէս ունեցած այդ կարգավիճակը վերականգնելու ցանկութիւն յայտնած են ՀՀ-էն տարբեր ժամանակներու մէջ Ռուսաստան եւ Ուքրանիա արտագաղթած հայաստանցիները, որոնք իրադարձութիւններու բերումով դարձեալ վերադարձած են Հայաստան: Փետրուար 24-էն Մարտ 14 Հայաստանի մէջ կացութեան կարգավիճակ ստանալու համար Անձնագրային եւ Վիզաներու Վարչութիւն դիմած են Ռուսաստանի 74 եւ Ուքրանիոյ 11 քաղաքացիներ:
Նշենք, որ ԵԱՏՄ երկիրներու քաղաքացիները Միութեան սահմաններուն մէջ ունին մինչեւ 6 ամիս ազատ բնակութեան իրաւունք: Հաշուառման պահանջը կը սկսի գործել արդէն տուեալ երկրին մէջ գտնուելու կէս տարին լրանալէն յետոյ: Եթէ անձը անկէ ետք շարունակէ բնակիլ Հայաստանի մէջ եւ որոշակի աշխատանքով զբաղիլ, կը ստանայ կացութեան կարգավիճակ: Հարկ է նշել նաեւ, որ Ռուսաստանի քաղաքացիները Հայաստանի մէջ կրնան աշխատիլ նաեւ առանց կացութեան կարգավիճակի` Հայաստանի մէջ աշխատիլը հաւաստող աշխատանքային պայմանագիր ունենալու պարագային, որու հիման վրայ Ռուսաստանի Դաշնութեան քաղաքացին կը հաշուառուի ժամանակաւոր բնակութեան հասցէով, կը ստանայ հանրային ծառայութիւններու համարանիշ` հարկային պարտաւորութիւնները կատարելու, աշխատողի իր իրաւունքներէն օգտուելու համար: