Կարեւոր է կառավարութեան եւ ԵԱՀԿ-ի միջեւ համագործակցութիւնը` Հայաստանի մէջ ժողովրդավարական բարեփոխումները արդիւնաւէտ յառաջ մղելու նպատակով, ըսած է վարչապետ Նիկոլ Փաշինեան` ընդունելով ԵԱՀԿ մամուլի ազատութեան հարցերով ներկայացուցիչ Թերեզա Ռիպէյրօն:
Վարչապետը շեշտած է, որ Հայաստանի մէջ ժողովրդավարութեան զարգացման ու ամրապնդման բարեփոխումներու օրակարգը կը շարունակէ մնալ կառավարութեան առաջնահերթութիւններէն մէկը:
Կարեւորելով նաեւ մամուլի ազատութեան ոլորտին մէջ 2018 թուականէն յետոյ արձանագրուած դրական փոփոխութիւնները` վարչապետը նկատած է, որ վերջին տարիներու ընթացքին Հայաստանի մէջ զանգուածային լրատուամիջոցներուն մեծ մասը, այդ շարքին` հեռուստատեսային, ունին ընդդիմադիր ուղղուածութիւն:
ժողովրդավարութեան ամրապնդման ոլորտին մէջ Հայաստանի կառավարութեան քայլերը ոգեւորիչ ու գնահատելի են, իր հերթին ըսած է Թերեզա Ռիպէյրօն` նշելով, որ ԵԱՀԿ-ը պատրաստ է նպաստելու նաեւ լրագրողներու փորձի փոխանակման, մասնագիտական կարողութիւններու զարգացման գործընթացին:
Ընդգծուած է նաեւ կառավարութեան եւ քաղաքացիական հասարակութեան սերտ համագործակցութեան կարեւորութիւնը: