«Եթէ ռուսների ներհոսքից մէկ տոկոսը պահպանուի, վստահ եղէք, Հայաստանը կ’ունենայ 10 տոկոսից աւելի տնտեսական աճ», ըսաւ տնտեսագիտութեան դոկտոր-փրոֆեսոր Թաթուլ Մանասերեան՝ անդրադառնալով Ռուսաստանէն Հայաստան եկող մասնագէտներու մեծ հոսքին:
Թ․ Մանասերեան կը գտնէ, որ պէտք է փորձել նոյնիսկ այդ ճգնաժամէն օգուտներ քաղել, օրինակ` մեր երկիրը պէտք է Ռուսաստանէն մեծ քանակութեամբ հումք` ուժանիւթակիրներ, հացահատիկ, փայտանիւթ ներկրէ եւ անոր համար ռուպլիով վճարէ: Յատկապէս որ Ռուսաստանը արդէն ռուպլիով առեւտուրը կը խրախուսէ:
Անդրադառնալով մտահոգութիւններուն՝ ռուս-ուքրանական պատերազմին հետեւանքով աշխարհի ու Հայաստանի մէջ հնարաւոր պարէնային հնարաւոր անբաւարարութեան, կ’ըսէ որ եթէ իրեն հնարաւորութիւն տրուի, ապա այս տարի կը լուծէ յատկապէս հացահատիկի խնդիրը` Հայաստանի տարածքին: Ան կը գտնէ, որ առաջին անհրաժեշտութեան 10 ապրանքախումբերը` հացահատիկը, մսամթերքը, կաթնամթերքն ու միւս ապրանքները, ըստ պահանջարկի, կրնան ամբողջութեամբ Հայաստանի մէջ արտադրուիլ:
Ինչ կը վերաբերի հացահատիկին, տնտեսագէտը կը հաւատացնէ, որ Հայաստանը Արցախի հետ միասին արտադրած է աւելի շատ հացահատիկ, քան պաշտօնական վիճակագրութիւնը այդ ներկայացուցած է: Պարզապէս, զայն թաքցուցած են ցորենի ստուերային շրջանառութիւն իրականացնելու պատճառով:
Թ․ Մանասերեան նաեւ կը վստահեցնէ, որ այս տարի ոչ թէ պէտք էր բարձրացնել կազի, ելեկտրաուժանիւթի եւ ջուրի սակագիները, այլ հակառակը` իջեցնել, եւ անոր համար կային բոլոր հիմքերը: