Ռուսաստանի մէջ ոչ-քաղաքացի աշխատողները արդէն լուրջ խնդիրներու բախած են, յառաջիկային ընդհանրապէս աշխատատեղիի խնդիր պիտի ըլլայ այդ երկրին մէջ: Նման դիտարկում կատարեց «Հայկական Քարիթաս» բարեսիրական հասարակական կազմակերպութեան աշխատանքային գաղթի ծրագրի փորձագէտ Տաթեւիկ Բեժանեանը:
«Արդէն իսկ ոչ մի լաւ զարգացում չկայ, նրանց գնողունակութիւնն առնուազն կիսով չափ կրճատուել է: Հնարաւոր է` յառաջիկայում Ռուսաստանում այլեւս չկարողանան վճարել ոչ-քաղաքացի աշխատողներին: Նրանց, ովքեր պատրաստւում եմ մեկնել ՌԴ, ես խորհուրդ եմ տալիս դեռեւս ձեռնպահ մնալ: Իսկ ովքեր այնտեղ են, երեւի պէտք է մտածեն Հայաստան գալու մասին, որովհետեւ չի բացառւում, որ որոշ ժամանակ անց իրենց արդէն չկարողանան վճարել», ըսաւ Բեժանեանը:
Նշենք, որ Կեդրոնական դրամատան հրապարակած վիճակագրութեան համաձայն` ֆիզիքական անձերու անունով ՀՀ դրամատուներու միջոցով 2021 թուականին Ռուսաստանէն Հայաստան փոխանցուած գումարներուն ծաւալը 2019 թուականի եւ անոր նախորդած տարիներուն համեմատ նուազած է: 2021-ին փոխանցումներու աճ արձանագրուած է միայն 2020-ի համեմատ, երբ Քովիտի համավարակով պայմանաւորուած` ճանապարհները փակ էին: Այսպէս, ըստ Կեդրոնական դրամատան հրապարակած տուեալներուն, 2021 թուականին ՀՀ դրամատուներու միջոցով ֆիզիքական անձերու անունով Ռուսաստանէն Հայաստան փոխանցուած է 865 միլիոն 580 հազար սոլար:
2020 թուականին Ռուսաստանէն փոխանցումները կազմած են 824 միլիոն 360 հազար տոլար: 2019 թուականին Ռուսաստանէն ՀՀ փոխանցումները կազմած էին 1 միլիառ 055 միլիոն 640 հազար տոլար, իսկ 2018-ին` 1 միլիառ 049 միլիոն 564 հազար տոլար: Ինչ կը վերաբերի արտահոսքին, ապա 2021 թուականին Հայաստանէն Ռուսաստան ֆիզիքական անձերու կողմէ փոխանցուած է 401 միլիոն 807 հազար տոլար, 2020-ին` 459 միլիոն 593 հազար տոլար, 2019-ին` 425 միլիոն 984 հազար տոլար, իսկ 2018-ին` 471 միլիոն 658 հազար տոլար:
Զուտ ներհոսքը, որ Ռուսաստանէն Հայաստան եւ հակառակ ուղղութեամբ փոխանցուած գումարներու տարբերութիւնն է, 2021 թուականին կազմած է 463 միլիոն 773 հազար տոլար: Ըստ Տաթեւիկ Բեժանեանի` դեռ շուտ է վերլուծութիւններ ընելը, բայց այսօր տեղի ունեցող զարգացումները մասնագէտներուն թոյլ կու տան եզրակացնել, որ Ռուսաստանի մէջ ոչ-քաղաքացի աշխատողներու համար լաւ ժամանակներ չեն սպասեր:
«Մենք կարող ենք ասել, որ այսօր արդէն ոչ-քաղաքացի աշխատողները կանգնել են խնդրի առաջ, հետեւաբար, գնացողները թող դեռեւս չգնան, իսկ ովքեր այնտեղ են, կարծում եմ` պէտք է սկսեն վերադառնալ», յաւելեց ան:
Նշենք, որ վերջին մէկ տարուայ ընթացքին Ռուսաստանը խստացուցած է ոչ-քաղաքացի աշխատողներուն քաղաքականութիւնը, այդ շարքին` ԵԱՏՄ անդամ երկիրներէ Ռուսաստանի Դաշնութիւն աշխատանքի մեկնողներուն համար: Իսկ օրէնքը խախտածներուն ընդհուպ արտաքսում կը սպառնայ:
