«Լեռնային Ղարաբաղի ժողովուրդը պէտք չէ խտրականութեան ենթարկուի իր ծագման, լեզուի, կրօնի, քաղաքական կամ այլ համոզմունքների, ազգային ծագման կամ այլ պատճառներով», Ժընեւի մէջ ՄԱԿ-ի Մարդու Իրաւունքներու Խորհուրդի 49-րդ նստաշրջանի բարձրաստիճան նիստին ընթացքին յայտարարած է Հայաստանի արտաքին գործերու նախարար Արարատ Միրզոյեանը:
Միրզոյեան նշած է, որ ՄԱԿ-ը եւ անոր մարմինները օժտուած են համընդհանուր մանտաթով` անվերապահ, անխոչընդոտ, անարգել հասանելիութիւն ունենալու կարիքի մէջ գտնուող մարդոց` անկախ անոնց գտնուելու վայրէն եւ հանգամանքներէն` կոչ ընելով միջազգային հանրութեան՝ «պատասխանատուութիւն ստանձնելու Լեռնային Ղարաբաղի ողջ տարածքում անվերապահ հասանելիութիւն ապահովելու համար»:
«ՄԱԿ-ի յատուկ ընթացակարգային մանտաթ կրողները մի քանի անգամ դիմում են յղել Ատրպէյճանին, որոնցում արծարծւում են Լեռնային Ղարաբաղի հակամարտութեան ծիրին մէջ վարձկաններ օգտագործելու, արտադատական մահապատիժների, կամայական ձերբակալութիւնների, բռնի անհետացումների, կրօնական եւ մշակութային ժառանգութեան ոչնչացման վերաբերեալ հարցեր: Ատրպէյճանը հրաժարուել է պատշաճ պատասխան տալ եւ փաստօրէն, ընդհանրապէս չի պատասխանել վերջին դիմումներին, ինչը բացայայտ մարտահրաւէր է ՄԱԿ-ի Մարդու իրաւունքների մեխանիզմին», նշած է Հայաստանի արտաքին քաղաքական գերատեսչութեան ղեկավարը:
«Անպատժելիութիւնը յանգեցնում է նոր խախտումների», ընդգծած է Միրզոյեան` ներկայացնելով, որ Լեռնային Ղարաբաղէն բացի Ատրպէյճանը «շարունակում է մարդու իրաւունքների խախտումների իր քաղաքականութիւնը` այժմ էլ Հայաստանի Հանրապետութեան սահմանամերձ շրջաններում, որտեղ քաղաքացիական բնակչութիւնը տուժում է Ատրպէյճանի զինուած ուժերի շարունակական սադրիչ գործողութիւններից»:
«Հրադադարի հաստատումից 16 ամիս անց Ատրպէյճանը շարունակում է պահել 38 հայ ռազմագերիների, այդ թւում` քաղաքացիական անձանց, իսկ հարիւրաւոր անյայտ կորածների, այդ թւում` տասնեակ բռնի անհետացածների ճակատագրերը մնում են չբացայայտուած», յայտարարած է Արարատ Միրզոյեանը:
«Մենք ձգտում ենք հասնել հայերի անվտանգ, արժանապատիւ եւ կամաւոր վերադարձին իրենց հայրենի տները` Լեռնային Ղարաբաղի ողջ տարածքում», ընդգծած է ան:
2021 թուականի Դեկտեմբեր 7-ին Միջազգային Դատարանին կողմէ առաջադրուած միջանկեալ միջոցները, որոնք Ատրպէյճանին կը հարկադրեն դադրեցնել հայերու նկատմամբ ցեղապաշտական եւ խտրական դրսեւորումները, ներառեալ հայկական մշակութային ժառանգութեան ոչնչացումը եւ վանտալիզմը, պէտք է անվերապահօրէն կատարուին, յայտարարած է Հայաստանի արտաքին գործերու նախարարը:
«Այս միջոցները գալիս են ապացուցելու Ատրպէյճանի հակահայկական քաղաքականութիւնը, այդ թւում` վերջինիս ռազմատենչ հռետորաբանութիւնը, ժողովրդին գոյատեւման միջոցներից զրկելը, հայ բնակչութեանն անընդհատ ահաբեկել ու ուժի կիրառման նոր սպառնալիքը:
Միայն այս խնդիրների հասցէագրմամբ մենք կարող ենք ապահովել մեր տարածաշրջանում կայունութիւն, խաղաղութիւն, արդարութիւն եւ մարդու համընդհանուր իրաւունքների պաշտպանութիւն», ըսած է Միրզոյեան:
Արտաքին գործերու նախարարը նաեւ նշած է, որ Հայաստանը մտադիր է խորհուրդի այս նստաշրջանին կրկին ներկայացնել Ցեղասպանութեան կանխարգելման մասին բանաձեւի նախագիծը. «Սա մի օրակարգ է, որը Հայաստանը տարիներ շարունակ յառաջ է մղում: Ժընեւում մեր խմբակը կազմակերպելու է խորհրդակցութիւնների թափանցիկ գործընթաց` բոլոր շահագրգիռ պետութիւնների եւ այլ կողմերի մասնակցութեամբ»:
Նշելով, որ այս տարի կը լրանայ Միացեալ Ազգերու Կազմակերպութեան Հայաստանի անդամակցութեան 30-ամեակը, Միրզոյեան վերահաստատած է Հայաստանի «անսասան յանձնառութիւնը բազմակողմանիութեանը, որի հիմքում է Միաւորուած Ազգերի Կազմակերպութիւնը, ինչպէս նաեւ մեր լիակատար հաւատարմութիւնը ՄԱԿ-ի կանոնադրութեան նպատակներին ու սկզբունքներին»:
