Լաչինը շրջանցող ճանապարհը շահագործման պիտի յանձնուի 2022 թուականի Յուլիսին: Այս մասին յայտարարած է Ատրպէյճանի Ճանապարհային Պետական Գործակալութեան ղեկավար Սալեհ Մամետովը:
«Այդ ճանապարհին երկարութիւնը 28 քիլոմեթր է, որուն 17 քիլոմեթրը արդէն կառուցուած է: Ճանապարհին շահագործումը կը ծրագրուի մինչեւ ընթացիկ տարուայ Յուլիսը», յայտարարած է Մամետով: Ատրպէյճանցի պաշտօնեան նշած է, որ ճանապարհը պիտի միացնէ Լաչինի շրջանի վեց գիւղեր: «Ներկայիս հայերը կ’անցնին Լաչինով: Լաչինը շրջանցող այլընտրանքային ճանապարհէն պիտի օգտուին ե՛ւ հայերը, ե՛ւ մեր քաղաքացիները», նշած է Մամետով:
Լաչինը շրջանցող ճանապարհին շինարարութիւնը Ռուսաստանի, Հայաստանի եւ Ատրպէյճանի ղեկավարներուն եռակողմ յայտարարութեան կէտերէն մէկն է. երեք տարուայ ընթացքին Լաչինի միջանցքի երկայնքով նոր երթուղիի կառուցման նախագիծ պէտք է հաստատուի, եւ այն պաշտպանելու համար այդտեղ նոյնպէս պէտք է ռուս խաղաղապահներ տեղակայուին: Նոր ճանապարհը Արցախի Հին Շէն, Մեծ Շէն գիւղերուն տարածքով պիտի անցնի:
Աւելի առաջ, Արցախի Բերդաձորի ենթաշրջանի համայնքներուն ղեկավարները յայտնած էին, որ Ատրպէյճանը սկսած է Արցախը Հայաստանին կապող նոր ճանապարհի շինարարութիւնը: Ատրպէյճանը պաշտօնապէս չէ յայտնած, որ այն՝ ինչ կը կառուցէ, Լաչինի ներկայիս միջանցքը փոխարինողն է:
Պաշտօնական Ստեփանակերտը` նախագահականը, Արտաքին Գործերու Նախարարութիւնը, ատրպէյճանական կողմի շինարարութիւնը չեն մեկնաբանած: Արցախի քաղաքաշինութեան նախարար Արամ Սարգսեան տեղեկացուցած էր, որ դեռ խորհրդատուութիւններու փուլին են, հայկական կողմը որեւէ շինարարական աշխատանք չէ սկսած: