Պաշտպանութեան նախարար Սուրէն Պապիկեան այցելած է Հայաստանի հարաւային ուղղութեամբ տեղակայուած շարք մը զօրամասեր, հետեւած է վերանորոգման եւ կառուցապատման ընթացող աշխատանքներուն:
Ինչպէս Հայաստանի ռազմական գերատեսչութիւնը կը հաղորդէ, զօրամասերու հրամանատարական կազմին հետ հանդիպումներուն ընթացքին Պապիկեան առանձնայատուկ կարեւորած է զինուորներու գիտելիքներուն եւ մարտունակութեան մակարդակի կտրուկ բարձրացման անհրաժեշտութիւնը:
Պաշտպանական գերատեսչութեան ղեկավարը եղած է նաեւ մարտական յենակէտերու մէջ, ծանօթացած է ընթացող ամրաշինական աշխատանքներուն, կենցաղային պայմաններուն եւ մարտական հերթապահութիւն իրականացնող անձնակազմի բարոյահոգեբանական վիճակին, տուած է յանձնարարականներ եւ ցուցումներ` խնդիրները սեղմ ժամկէտերու մէջ վերացնելու վերաբերեալ:
Նախարարը այցելած է նաեւ Զանգեզուրի կայազօրային հիւանդանոց, ինչպէս նաեւ զրուցած է հիւանդանոցին մէջ ապաքինուող զինուորներուն հետ:
