Միացեալ Թագաւորութիւնը Լեռնային Ղարաբաղի հակամարտութիւնը լուծուած չի համարեր եւ կը փափաքի խնդիրը լուծուած տեսնել համապարփակ խաղաղ կարգաւորման միջոցով` ԵԱՀԿ Մինսքի խմբակի համանախագահներու հովանիին ներքոյ ընդունուած հիմնարար սկզբունքներու հիման վրայ: Հայաստան-Մեծն Բրիտանիա դիւանագիտական յարաբերութիւններու հաստատման 30-ամեակին առիթով այս մասին յայտնած է Հայաստանի Հանրապետութեան մէջ Մեծն Բրիտանիոյ եւ Հիւսիսային Իրլանտայի Միացեալ Թագաւորութեան արտակարգ եւ լիազօր դեսպան Ճոն Կալակերը` ընդգծելով, որ Բրիտանիան լիովին կ’աջակցի Մինսքի խմբակի ամերիկացի, ֆրանսացի եւ ռուս համանախագահներու ջանքերուն եւ կողմերը կը խրախուսէ կառուցողականօրէն ներգրաւուելու բանակցային գործընթացին մէջ:
Խօսելով հայ-բրիտանական յարաբերութիւններու պատմութեան, վերջին երեք տասնամեակներուն իրականացուած աշխատանքին եւ ընթացիկ աշխուժութեան մասին, Նորին Մեծութիւն Էլիզապէթ Բ.-ի դեսպանը գոհունակութեամբ արձանագրած է երկկողմ կապերու աճը առեւտուրի ոլորտին, մշակութային կեանքին եւ մարդոց միջեւ, ինչպէս նաեւ` կանաչ զարգացման ու կլիմայի փոփոխութիւնը դիմագրաւելու յաւակնոտ մօտեցումներուն աջակցելու բնագաւառին մէջ:
Դեսպան Կալակերը երկկողմ յարաբերութիւններու հիմքին գտնուող իրաւապայմանագրային դաշտի ընդլայնումը կը համարէ իր եւ Հայաստանի մէջ իր ղեկավարած դեսպանութեան կարեւոր առաջնահերթութիւնը: Այս ծիրին մէջ, ան տեղեկացուցած է, որ բրիտանական կառավարութիւնը այժմ կ’աշխատի Հայաստանի Հանրապետութեան հետ` վերջնական տեսքի բերելու Միացեալ Թագաւորութիւն-Հայաստանի Հանրապետութիւն Համապարփակ եւ ընդլայնուած գործընկերութեան համաձայնագիրը, որ կ’ընդգրկէ երկկողմ հարցերու ամբողջ շրջանակը: