Home ԳԼԽԱՒՈՐ ԼՈՒՐԵՐ Ո՞Վ է ՔՊ-ի Նախագահի Թեկնածու Վահագն Խաչատուրեանը

Ո՞Վ է ՔՊ-ի Նախագահի Թեկնածու Վահագն Խաչատուրեանը

by MassisPost

«Քաղաքացիական Պայմանագիր» խմբակցութիւնը նախագահի թեկնածու առաջադրած է Բարձր արհեստագիտական արդիւնաբերութեան նախարար Վահագն Խաչատուրեանը: Այս մասին յայտնեց Ազգային Ժողովի նախագահ, ՀՀ նախագահի պաշտօնակատար Ալէն Սիմոնեանը:

62-ամեայ Վահագն Խաչատուրեանը մինչ նախարար նշանակուիլը քաղաքական վերջին պաշտօնը զբաղեցուցած էր 90-ականներու աւարտին եւ աւելի քան 20 տարուան ընթացին ան աւելի յայտնի էր իր տնտեսագիտական վերլուծութիւններով:

Խորհրդային տարիներուն Խաչատուրեանը ղեկավար պաշտօններ զբաղեցուցած է «Հրազդանմեքենայ» եւ «Մարս» գործարաններուն մէջ: Քաղաքական գործունէութիւնը սկսած է նորանկախ Հայաստանի կազմաւորման շրջանին: 1992-1996 թուականներուն, երբ նախագահը Լեւոն Տէր Պետրոսեանն էր, եղած է Երեւանի քաղաքապետը, 1996-1999-ին` Ազգային Ժողովի պատգամաւոր: 1996-1998-ին զբաղեցուցած է նաեւ նախագահ Տէր Պետրոսեանի խորհրդականի պաշտօնը:

Խաչատուրեանը Հայաստանի առաջին նախագահին գլխաւորած Հայ Ազգային Գոնկրէսի (ՀԱԿ) նախկին անդամ է, 2008-2012 թուականներուն աշխուժօրէն մասնակցած է կուսակցութեան կազմակերպած ցոյցերուն, 2013-ին մասնակցած է Երեւանի քաղաքապետի ընտրութիւններուն` գլխաւորելով ՀԱԿ-ի ցուցակը: Գոնկրէսը չյաղթահարեց 5 տոկոս շեմը եւ մայրաքաղաքի աւագանիին մաս չկազմեց:

Նախքան Փաշինեանի կառավարութեան մաս կազմելը, մասնագիտութեամբ տնտեսագէտ Խաչատուրեանը հիմնականին մէջ դրական արտայայտուած էր այժմու իշխանութիւններուն տնտեսական քաղաքականութեան մասին: 44-օրեայ պատերազմէն յետոյ, երբ տարածաշրջանի ապաշրջափակման թեման դարձաւ թիւ մէկ քննարկման առարկայ, Խաչատուրեանը «Ազատութեան» յայտարարած էր` եթէ պէտք է ճանապարհը բացուի եւ ներդրումներ ըլլան, զուտ տնտեսագիտօրէն տրամաբանական չէ արհեստական խոչընդոտներ ստեղծելը. «Էստեղ շատ կարեւոր հանգամանք է ի հարկէ քաղաքական գործօնը: Եւ քաղաքական գործօնն է, որ մինչեւ հիմա խանգարել է, այդ քսան տարիների ընթացքում շահարկուել է եւ ոչինչ չի արուել: Ես նորից եմ կրկնում` պէտք է էնպիսի մի իրավիճակում մենք լինէինք, երբ որ ապաշրջափակման հարցը արդէն օրակարգում լինէր, գզրոցներից կամ դարակներից այս փաստաթղթերը պէտք է հանուեն, դնէին սեղանին ուղղակի»:

Հարակից Նյութեր

Leave a Comment