Home ԳԼԽԱՒՈՐ ԼՈՒՐԵՐ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի Ուղերձն Ամանորի Առիթով

Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի Ուղերձն Ամանորի Առիթով

by MassisPost

Սիրելի բարեպաշտ ժողովուրդ ի Հայաստան, յարցախ եւ ի սփիւռս,

Նոր տարուայ սեմին Մայր Աթոռ Սուրբ Էջմիածնից Հայրապետական Մեր օրհնութիւնը, սերն ու բարեմաղթանքներն ենք բերում ամէնքիդ:

Ցաւով ու դառնութիւններով լեցուն տարի ապրեցինք: Արցախեան աղէտալի պատերազմի հետեւանքները, Հայաստան եւ Արցախ մեր հայրենիքի շուրջ ծաւալուող բարդ ու մտահոգիչ գործընթացները, երկրում տիրող դժուարին իրավիճակը զրկել են մեզ առօրեայ, ինչպէս եւ ամանորեայ բնական ուրախութիւնից:

Այդուհանդերձ, Նոր տարին դիմաւորում ենք յոյսով ու հաւատով, որ վերակերտելու ենք հայրենական մեր կեանքը եւ միասնական կամքով ամէն ջանք ի գործ ենք դնելու` յանուն Արցախի մեր ժողովրդի իրաւունքների պաշտպանութեան: Մենք Քրիստոսի յարութեանը հաւատացող ժողովուրդ ենք, դարերի հոլովոյթում ցաւը, տառապանքն ու մահը մեզ երբեք չեն յաղթել, վեր ենք յառնել Տիրոջ պարգեւած շնորհի զօրութեամբ, վաղուայ օրուայ հանդէպ լաւատեսութեամբ: Հաւատում ենք, որ Աստծոյ ողորմածութեամբ եւ մեր ժողովրդի հաստատակամ յանձնառութեամբ փրկչական 2022 թուականը կը կարողանանք դարձնել ազգօգուտ եւ հայրենաշեն իրագործումների տարի: Հայաստանի զօրացման, Արցախի ազատ ու ապահով կեանքի, աշխարհասփիւռ մեր ժողովրդի վերելքի եւ յարատեւութեան ուղին մեր համախմբումն է ապագայի համընդհանուր տեսլականի շուրջ, ինչպէս եւ` ազգային ու հոգեւոր արժէքների վրայ խարսխուած ապրելակերպն ու գործերը: Ամէնուր, ի սեր հայրենիքի, վերատեսութեան ենթարկենք մեր ընթացքը, թօթափենք անհանդուրժողութեան եւ ատելութեան չարիքը, հրաժարուենք անպատասխանատու, ազգավնաս խօսքերից ու արարքներից, լինենք բարի, լինենք սիրով, լինենք միասնական, որպէսզի վերստին զգանք Աստծոյ շնորհաբեր ներկայութիւնը մեր  կեանքում:

Մեր տարածաշրջանի բարդ զարգացումների եւ մեր երկրի առջեւ ծառացած մարտահրաւէրների  յանդիման` հզօր հայրենիքի կերտման ձգտումներում չենք կարող յաջողել, եթէ նախ չվերականգնենք վստահութեան մթնոլորտը,  չվերահաստատենք մեր ներքին խաղաղութիւնը: Մեր նահատակ զաւակների սրբազան յիշատակի առջեւ խոնարհումով ու երախտագիտութեամբ եւ հայրենիքի ու ազգի հանդէպ մեր հերոսների անձնուիրումի ու սիրոյ օրինակով ամէն կարելին ի գործ դնենք երկրի ու պետութեան առաջընթացի, համայն մեր ժողովրդի բարօրութեան համար: Ամուր ու անսասան մնանք համազգային շահով առաջնորդուելու նախանձախնդրութեան մէջ, եւ Աստուած մեզ համար պիտի աճեցնի արդարութեան պտուղները (հմմտ. Բ Կորնթ․ 9.10):

Տարեմուտի նուիրական այս պահին հրաւիրում ենք բոլորիդ միասնաբար աղօթելու, որ Բարձրեալ Տիրոջ օրհնութեամբ իրականութիւն դառնան մեր բարի ձգտումները անձնական, ընտանեկան, ազգային ու հայրենական կեանքում: Աղօթենք Հայոց բանակի, հայրենիքի սահմանները հսկող մեր զինուորների համար: Աղօթենք բոլոր նրանց համար, ովքեր իրենց ծառայութեան մէջ են դիմաւորում Ամանորը: Աղօթենք նեղեալների, կարիքաւորների, հիւանդների, հաշմանդամ դարձած, գերեվարուած եւ անյայտ կորած մեր որդիների եւ նրանց վշտակիր ընտանիքների համար: Աղօթենք Սիրիայում, Լիբանանում եւ Իրաքում դժուարութիւնների մէջ ապրող մեր զաւակների համար, որպէսզի Երկնաւոր Տիրոջ զօրակցութեամբ յաղթահարուեն նրանց առջեւ ծառացած խնդիրները:

Հայցենք խաղաղութիւն ու անվտանգութիւն Հայաստան ու Արցախ մեր հայրենիքին, աշխարհասփիւռ մեր ժողովրդին եւ համայն աշխարհին: Եւ Աստուած, որ … մեզ տուեց յաւիտենական մխիթարութիւն եւ բարի յոյս, իբրեւ շնորհ, թող մխիթարի եւ հաստատ պահի մեր սրտերը ամէն բարի խօսքի եւ գործի մէջ (հմմտ. Բ Թեսաղ. 2.15-16): Թող Տիրոջ սերը, ողորմութիւնն ու օրհնութիւնը միշտ լինեն մեզ հետ եւ ամէնքի: Բարի Նոր տարի:

Հարակից Նյութեր

Leave a Comment