«Մանկական Եւրատեսիլ 2021» երգի միջազգային մրցոյթին, որ տեղի ունեցաւ Դեկտեմբեր 19-ին Ֆրանսայի մայրաքաղաք Փարիզի մէջ, յաղթեց Հայաստանի ներկայացուցիչ Մալենան՝ «Քամի-քամի» երգով: Վաստակելով 224 կէտ:
Ժիւրիի քուէարկութեան շնորհիւ Հայաստանը 10-ական կէտ ստացաւ Գերմանիայէն, Ֆրանսայէն, Սպանիայէն, 5-ական կէտ՝ Վրաստանէն, Մալթայէն, 12 կէտ՝ Լեհաստանէն, Փորթուգալէն, 2-ական կէտ՝ Պուլկարիայէն, Հիւսիսային Մակեդոնիայէն, 6-ական կէտ՝ Ռուսիայէն, Ղազախստանէն, Ալպանիայէն, 7-ական կէտ՝ Իռլանտայէն, Ուքրանիայէն, Հոլանտայէն, 8 կէտ՝ Սերպիայէն: Մեր երկիրը իր 12 կէտերը տուաւ Վրաստանի մասնակիցին: Հեռուստադիտողի քուէարկութեան շնորհիւ Մալենան վաստակեց 109 կէտ:
Մրցոյթին մասնակցեցան 19 երկիրներ՝ Գերմանիան, Վրաստանը, Լեհաստանը, Մալթան, Իտալիան, Պուլկարիան, Ռուսիան, Իռլանտան, Հայաստանը, Ղազախստանը, Ալպանիան, Ուքրանիան, Ֆրանսան, Ատրպէճանը, Հոլանտան, Սպանիան, Սերպիան, Հիւսիսային Մակեդոնիան, Փորթուգալը:
218 միաւորով երկրորդը Լեհաստանն է, 187 միաւորով երրորդ հորիզոնականը գրաւեց Ֆրանսան:
Հայաստանը երկրորդ անգամն է, որ կը յաղթէ մանկական Եւրատեսիլին՝ առաջին յաղթողը Վլատիմիր Արզումանեանն էր՝ 2010 թուականին:
