Դեկտեմբեր 9-ին յայտնի դարձաւ, որ օրերս Հայաստան վերադարձած տասը գերիներէն հինգին մեղադրանք առաջադրուած է մարտական հերթապահութիւն կամ մարտական ծառայութիւն կրելու կանոնները խախտելու յօդուածով։ Այս արարքը կը պատժուի երեքէն ութ տարի ազատազրկմամբ։
Դեկտեմբեր 4-ին Հայաստան վերադարձուած գերիներէն երկուքը՝ պայմանագրային զինծառայողներ, դատարանի որոշմամբ կալանաւորուած են։ Ինչպէս «Ազատութիւն»ին հաղորդեցին նախկին գերիներու պաշտպանները, դատարանը մերժած է զօրամասի գումարտակի հրամանատարի տեղակալ, մայոր Նարեկ Երեմեանի կալանաւորման միջնորդութիւնը։
Զինծառայողներէն երկուքի կալանքի հարցը դատարանը դեռ կը քննէ։ Մեղադրեալի կարգավիճակ ունեցող զինծառայողները գերեվարուած էին Նոյեմբեր 16-ին՝ Սիւնիքի ու Վայոց Ձորի սահամանագօտիէն ներս ծաւալուած արիւնալի մարտերու օրը։ Այդ օրը հայկական կողմը երկու դիրք կորսնցուցած էր ։ Աւելի վաղ այս գործի ծիրէն ներս կալանաւորուած էին կորսուած դիրքի երկու պատասխանատուները՝ մարտական ծառայութեան կանոնները խախտելու մեղադրանքով։
