Եւրոպական Միութեան խորհուրդի ղեկավար՝ Շարլ Միշէլ կրկին կոչ ըրած է Երեւանին եւ Պաքուին երկկողմանի յարաբերութիւններուն մէջ առկայ խնդիրները լուծելու երկխօսութեան միջոցով։ Այս մասին Միշելը յայտարարած է «Արեւելեան գործընկերութեան» քաղաքացիական հասարակութեան համաժողովի» մասնակիցներու համար տեսագրուած ուղերձով։
«Ձգձգուած հակամարտութիւնները լուրջ մարտահրաւէր կը հանդիսանան «Արեւելեան գործընկերութեան» տարածաշրջանին համար։ Պէտք է նոր ջանքեր գործադրել, որպէսզի հակամարտութիւնները լուծուին միջազգային իրաւունքի օրէնքներուն եւ սկզբունքներուն հիման վրայ։ Եւրոպական Միութիւնը պատրաստ է դերակատարութիւն ստանձնելու հակամարտութիւններու կարգաւորման, զանոնք կանխելու ուղղութեամբ», յայտնած է Շարլ Միշէլ աւելցնելով,- «Հայաստանի եւ Ատրպէյճանի յարաբերութիւնները կը վկայեն, թէ որքան փխրուն է իրավիճակը։ Որեւէ կասկած չունիմ, միայն քաղաքական երկխօսութիւնն է, որ կրնայ յանգեցնել յարատեւ լուծման։ Երկու երկիրներու քաղաքացիական հասարակութիւնները եւս կրնան նպաստել անոր, կամուրջելով հանրութիւնները եւ աջակցելով հաշտեցման ուղղուած ջանքերուն»։
