Անգարան կրկին Երեւանին կոչ կ’ընէ ընդառաջելու խաղաղութեան մեկնուած ձեռքին եւ օգտուիլ ստեղծուած հնարաւորութենէն:
Նախօրէին նախագահ՝ Ռէճէպ Թայէպ Էրտողանի նախագահութեամբ գումարուած Թուրքիոյ ազգային անվտանգութեան խորհուրդի նիստին օրակարգային շարք մը հարցերու կարգին քննարկուած են նաեւ Կովկասեան տարածաշրջանի վերջին զարգացումները:
Շուրջ երեք ժամ տեւած նիստէն յետոյ հրապարակուած յայտարարութեան մէջ մասնաւորապէս ըսուած է. «Նիստին քննարկուած են Սեւծովեան եւ Կովկասեան տարածաշրջանի վերջին զարգացումները, ընդգծուած է մեր հիւսիսային հարեւաններու միջեւ միջազգային իրաւունքի եւ երկիրներու տարածքային ամբողջականութեան նկատմամբ յարգանքի հիման վրայ, խաղաղ ճանապարհով անհամաձայնութիւններու շուտափոյթ հարթման կարեւորութիւնը: Բացի այդ, կարեւորուած է Հայաստանի կողմէ հրադադարի պահպանման եւ խաղաղութեան առաջարկէն օգտուելով համագործակցութեան երթալու անհրաժեշտութիւնը»: