Ատրպէյճանի արտաքին գերատեսչութեան ղեկավար՝ Ճէյհուն Պայրամով այսօր՝ Նոյեմբեր 4-ին ըսած է, որ ինք տեղեկութիւն չունի Ատրպէյճանի նախագահ Իլհամ Ալիեւի եւ Հայաստանի վարչապետ Նիկոլ Փաշինեանի հնարաւոր հանդիպման մասին` միեւնոյն ժամանակ աեւլցնելով, որ կարելի չէ բացառել ապագային նման հանդիպման կայացումը:
«Ոչ մէկ տեղեկութիւն Ալիեւ-Փաշինեան հանդիպման մասին չկայ»,- այսօր լրագրողներու հետ զրոյցին ըսած է Պայրամովը:
Հայաստանի վարչապետ՝ Նիկոլ Փաշինեան եւ Ատրպէյճանի նախագահ՝ Իլհամ Ալիեւը Ռուսաստանի նախագահ՝ Վլատիմիր Փութինի միջնորդութեամբ անցեալ տարուայ Նոյեմբեր 9-ին հեռավար կարգով համաձայնեցուցած են պատերազմը աւարտելու յայտարարութիւնը:
Այս տարուայ Յունուար 11-ին երեք ղեկավարները հանդիպած են Մոսկուայի մէջ, ուր համաձայնեցուցած են տարածաշրջանի փոխադրային ուղիները վերագործարկելու հարցը: Անկէ յետոյ հայ-ռուս-ատրպէյճանական հանդիպումները շարունակուած են երեք երկիրներու փոխվարչապետներու մակարդակով:
Բացի այդ, այս տարուայ Սեպտեմբեր 23-ին ԵԱՀԿ Մինսքի խումբի համանախագահներու մասնակցութեամբ Նիու Եորքի մէջ` ՄԱԿ-ի Ընդհանուր գագաթնաժողովի 76-րդ նստաշրջանի ծիրէն ներս, հանդիպած են Հայաստանի եւ Ատրպէյճանի արտաքին գերատեսչութիւններու ղեկավարներ՝ Արարատ Միրզոյեանը եւ Ճէյհուն Պայրամովը: