Արևմտյան թեմն ունի տասնութ շաբաթօրյա դպրոց՝ Լոս Անճելոսում և Կալիֆորնիայի տարբեր քաղաքներում, որտեղ հայ երիտասարդ սերունդը սովորում է մեր լեզուն, կրոնը, պատմությունը, մշակույթը, երգն ու պարը, մեր ազգային արժեքները և հայրենասիրության առաքինությունը՝ հարատև պահելու Հայ ինքնությանը կրակը: Այս ազգապահպան աշխատանքը նախաձեռնել է շաբաթօրյա դպրոցների Գիտակրթական Խորհուրդը և ուսուցչական կազմը՝ առաջնորդությամբ և հովանավորությամբ Արևմտյան Թեմի Բարեխնամ Առաջնորդ Գերաշնորհ Տ․ Հովնան Արք․Տերտերյանի։
Թեմական շաբաթօրյա դպրոցները առաջնորդվում են հայոց լեզվի, հայ գրականության, պատմության, կրոնի և մշակույթի համապարփակ ուսումնական ծրագրով, որը հիմնված է Քալիֆորնիա նահանգի կողմից սահմանված լեզուների դասավանդության հիմնական չափանիշների վրա: Ծրագրի աղբյուրներն են տեղական և հայրենական տպագրության հայերենի ու հայ գրականության դասագրքերը, հայոց պատմության, հայ մշակույթի, հայրենագիտության և արդիական հարցերի շուրջ առկա նյութերը, գիտարվեստի միջոցներ, հայկական կայքէջեր և զանազան լսա-տեսողական միջոցներ: Ծրագիրը ընդգրկում է նաև աշակերտի լեզվի իմացության մակարդակը, տարիքային և հոգեբանական առանձնահատկությունները և սովորելու կարողությունները:
Շաբաթօրյա դպրոցների հիմնական նպատակն է մեր մանուկնրին տալ ամբողջական Հայեցի կրթություն, որպեսզի նրանք կարողանան՝
—հաղորդակցվել մայրենի լեզվով
—հասկանալ և գնահատել մեր պատմական և մշակութային արժեքները
—ունենալ հպարտ ազգային ինքնագիտակցություն
—լինել հպարտ իրենց լեզվով, հավատով, մշակույթով և Հայրենիքով
—ունենալ պատասխանատվության գիտակցություն Հայ համայնքի, Եկեղեցու, ապրած երկրի և Հայրենիքի հանդեպ
—Ունենալ հանդուրժողականություն և հարգանք այլ ժողովուրդնրի և մշակույթների նկատմամբ։
Մանկավարժական նոր մոտեցումներին ծանոթացնելու նպատակով, յուրաքանչյուր ուսումնական տարվա սկզբին Առաջնորդ Հովնան Սրբազանի գլխավորությամբ դպրոցների Գիտակրթական Խորհուրդը կազմակերպում է շաբաթօրյա դպրոցների ուսուցիչների վերապատրաստման ամենամյա աշխատանիստեր: Վերջին՝ տասնմեկերրդ աշխատանիստը տեղի ունեցավ այս տարի օգոստոս տասնչորսին մասնակցությամբ Հայաստանի Հանրապետության Լեզվի Պետական Կոմիտեի տնօրեն, Բանասիրական Գիտությունների Դոկտ. պրոֆեսոր Դավիթ Գյուրջինյանի և Սփյուռք Գիտական Կենտրոնի տնօրեն, Բանասիրական Գիտությունների Դոկտ․, պրոֆեսոր Սուրեն Դանիելյանի։
Շնորհակալություն բոլոր դպրոցների տնoրիններին և ուսուցչական կազմին իրենց կատարած հայակերտման մեծ աշխատանքի համար, բեմերից համայնքին ներկայացված գրական-երաժշտական հանդեսների համար, ուր ներկա է մեր Հայրենիքը, Արցախի զինվորը, մեր աղոթքը, մեր բանաստեղծը, մեր երգն ու պարը: Շնորհակալություն մեր ծնողներին, որոնք սատարում են Հայ Դպրոցը՝ դարձնելով այն մի կտոր հող և շունչ մեր Հայրենիքից:
Մանկ․ Գիտ․Դոկտ. Էլլի Է. Անդրեասյան,
Շաբ. Դպրոցների Գիտակրթականկան Խորհուրդի Ատենապետուհի