Պաշտօնական Թեհրանը կը հերքէ իրանցի երկու վարորդներու ազատ արձակուելու մասին տեղեկութիւնները:
Ատրպէյճանի իշխանութիւններու կողմէ իրանական բեռնատարներու, մէկ ամիս առաջ ձերբակալուած երկու վարորդներու ազատ արձակման մասին տեղեկութիւնները չեն համապատասխաներ իրականութեան, երէկ՝ Հոկտեմբեր 13-ին յայտարարած է Իրանի Արտաքին գործոց նախարարութեան պաշտօնական ներկայացուցիչ՝ Սաիտ Խաթիպզատէն:
ISNA գործակալութեան հաղորդմամբ՝ ան պարզաբանած է, որ «Իրանի հետ խորհրդակցութիւններէն յետոյ երկու իրանցի բանտարկեալներ Ատրպէյճանէն կը տեղափոխուին Իսլամական Հանրապետութիւն՝ պատիժի մնացած մասը կրելու համար»: «Այս երկու անձինք ոչ մէկ կապ ունին ձերբակալուած վարորդներուն հետ», – ընդգծած է Խաթիպզատէն՝ աւելցնելով, որ «այդ հարցի շուրջ խորհրդակցութիւնները կը շարունակուին»:
Երէկ աւելի վաղ Fars գործակալութիւնը, վկայակոչելով իր աղբիւրը, յայտնած էր, որ Ատրպէյճանի իշխանութիւնները ազատ արձակած են իրանական բեռնատարներու երկու վարորդները, որոնք մէկ ամիս առաջ ձերբակալուած են ատրպէյճանցի սահմանապահներու կողմէն Գորիս-Կապան ճանապարհին:
