«Շատ կարեւոր է ԵԱՀԿ Մինսքի խումբի համանախագահներու դերը իրավիճակի կայուն լուծման համար», Հայաստանի նախագահը հիւրընկալելով եւ անդրադառնալով ղարաբաղեան խնդիրին` ըսած է Իտալիոյ նախագահը:
«Մենք միանգամայն համոզուած ենք, որ վերջնական լուծում կարելի է գտնել բանակցային գործընթացի միջոցով»,- ըսած է Սերժիօ Մաթարելլան` շարունակելով,- «Անհրաժեշտ է, որ երկկողմանի կառուցողական մթնոլորտ ստեղծուի, որպէսզի իրավիճակը կարգաւորուի»:
Նախագահի աշխատակազմի հաղորդմամբ` Արմէն Սարգսեան համաձայնած է իր իտալացի գործընկերոջ հետ` ընդգծելով, որ Լեռնային Ղարաբաղի կարգավիճակի հարցը կը մնայ չլուծուած եւ լուծումը համանախագահներու աջակցութեամբ բանակցային ճանապարհն է:
Հանդիպման ընթացքին անդրադարձ եղած է նաեւ համավարակին. Մաթարելլան տեղեկացուցած է, որ Իտալիան COVID 19-ի դէմ պատուաստի 45 հազար դեղաչափ առանձնացուցած է Հայաստանի համար:
Հայաստանի Հանրապետութեան պատմութեան ընթացքին այս երկրի նախագահի առաջին պետական այցն է Իտալիա: Ան մեկնարկած է Հոկտեմբեր 5-ին: