«Իմ ապագան, իմ երեխաների ապագան, իմ հարազատների ապագան ես տեսնում եմ Արցախում. որեւէ տեղ տեղափոխուելու որեւէ ցանկութիւն չունենք, մտադիր չենք»: Այս մասին Արցախի մէջ, երիտասարդներու հետ հանդիպման ժամանակ նշած է Արցախի նախագահ՝ Արայիկ Յարութիւնեանը:
«Մենք Արցախի տարածքային ամբողջականութեան վերաբերեալ շարունակելու ենք բանակցային գործընթաց, խաղաղ պայքար: Մենք պէտք է խուսափենք պատերազմից, ի հարկէ արժանապատուօրէն: Դրա համար խաղաղութեան օրակարգը պէտք է արժանապատիւ խաղաղութեան օրակարգ լինի:
Բանակցային գործընթացը շարունակւում է, օրակարգում որեւէ փոփոխութիւն չկայ, ազգերի ինքնորոշման իրաւունքը որպէս հիմնական կէտ մնում է: Մեր պայքարը լինելու է դրա շրջանակներում, այսինքն ինքնորոշման իրաւունքը մեզ համար գլխաւոր բանակցային ուղղութիւնն է: Արցախի ապագան հենց ինքնորոշման ճանապարհով եմ ես տեսնում»,-ըսաւ Յարութիւնեան:
Անդրադառնալով Լաչինի միջանցքին, ան ըսաւ. «Բացառւում է, որ ատրպէյճանական անցակէտ լինի միջանցքում: Ձեւակերպուած է միջանցք, իսկ եթէ կայ անցակէտ, դա միջանցք չէ, վերահսկուող ճանապարհ է: Նման բան չկայ»: