«Պատուաստանիւթը 97,5 տոկոսով պաշտպանում է «Քորոնա» ժահրի վարակուածութիւնից եւ 98,2 տոկոսով՝ հիւանադանոց փոխադրուելից»: Ինչպէս կը տեղեկացնէ «Արմէնփրէս»-ը՝ այդ մասին Կառավարութեան նիստին նշեց վարչապետ Նիկոլ Փաշինեան՝ աւելցնելով, որ թուաբանութիւնը պատկերաւոր ձեւով ցոյց կու տայ, թէ ինչ տեղի կ’ունենայ:
«Պատուաստուածների մօտ վարակուածութեան տոկոսն աւելի ցածր է, քան կրկնակի վարակի դէպքերը: Կրկնակի վարակի դէպքերը կարող են մինչ 3-4 տոկոսի հասնել:»,- ըսաւ ան:
Անդրադառնալով նրան, որ Հոկտեմբեր 1-էն քաղաքացիները աշխատանքի երթալու ատեն կամ պէտք է ներկայացնեն պատուաստուած ըլլալու մասին փաստաթուղթ, կամ ամսական երկու անգամ հետազօտուին, որ վճարովի է, Նիկոլ Փաշինեան նշեց.
«Ինձ զարմացնում է այն, երբ հարցադրում է արւում, թէ ինչպէս կարելի է մարդկանց համար հետազօտման լրացուցիչ ֆինանսական ծախսեր սահմանել: Մարդկանց համար ամենեւին որեւէ լրացուցիչ ծախս չի սահմանւում, որովհետեւ մարդիկ այդ ծախսն անելու կարիքը չունեն, պետութիւնը հոգում է, որ բոլոր մարդիկ բացարձակապէս անվճար ստանան պատուաստում: Քաղաքացին ինքն է ընտրում ծախս անի՞, թէ՞ չանի»,- ըսաւ Նիկոլ Փաշինեան՝ աւելցնելով, որ 300 հազարէն աւելի պատուաստումներու պարագային չունինք յիշատակման արժանի որեւէ բարդութիւն:
«Փորձում են պատուաստման մէջ դաւադրութիւն տեսնել, սակայն ընդգծեմ, որ Կառավարութիւնն առաջինն ինքն է պատուաստուել: Այս դահլիճում բոլորը պատուաստուած են, եթէ չունեն հակացուցում: Ինքս պատուաստուած եմ, մեր ընտանիքի անդամները պատուաստուած են: Եթէ մենք հակամարմինների հետ կապուած զգանք, որ կայ անհրաժեշտութիւն նորից պատուաստուելու, մենք դա անպայման պէտք է անենք: Այսօր կարողութիւններ ունենք օրական մինչեւ 10 հազար մարդու պատուաստել: Մենք հիմա եզրային վիճակում ենք, ու պէտք է կոչ անեմ՝ համաճարակային կանոնները պահել»,- ընդգծեց Նիկոլ Փաշինեան:
Վերջին օրերուն Հայաստանի մէջ արձանագրուած է քաղաքացիներու պատուաստման գործընթացի էական աշխուժացում: Ինչպէս հաղորդած է «Արմէնփրէս», այդ մասին Կառավարութեան նիստին նշեց Առողջապահութեան նախարար՝ Անահիտ Աւանէսեան:
«Վերջին օրերին օրական պատուաստումների թուի շեշտակի աճ ունենք: Երէկ չէ առաջին օրը իրականացրել ենք 9 հազար 924 պատուաստում, երէկ՝ 8440 պատուաստում: Սա խօսում է այն մասին, որ քաղաքացիների մօտ, վստահութեան մեծացման առումով, փոփոխութիւն կայ: Իրականացրած 385 հազար 503 պատուաստումների արդիւնքում մարդիկ տեսնում են, որ որեւէ խնդիր չունենք: Պատուաստումներն արդիւնաւէտ են, անվտանգ, պաշտպանում են «Քորոնա» ժահրով պայմանաւորուած մահերից»,-ըսաւ նախարարը՝ աւելցնելով, որ ներկայ դրութեամբ դէպքերու թիւը 11 հազար 470 է, որմէ ընդամէնը 286-ը պատուաստուած քաղաքացիներ են:
«Այո, պատուաստումը 100 տոկոսով չի բացառում վարակման վտանգը, այն շեշտակի նուազեցնում է, բայց ամենակարեւոր նպատակն այն է, որ այս քաղաքացիները հիւանդութիւնը տանում են աւելի թեթեւ: Հիւանդանոցներում գտնուող 2006 քաղաքացիներից ընդամէնը 38-ն են, որ պատուաստուած են: Շատ երկրներում փաստւում է, որ պատուաստումների արդիւնքում կտրուկ նուազում է հիւանդանոցային ու ծանր դէպքերի ցուցանիշը»,- ըսաւ Անահիտ Աւանէսեան:
