Միջին Արեւելքի տարբեր քաղաքներու եւ աշխարհի տարբեր երկիրներու թեմերը ծառայութիւն կատարող Հայ Կաթողիկէ եկեղեցւոյ եպիսկոպոսները Սեպտեմբեր 20-ին հրաւիրուած են Հռոմ՝ Հայ Կաթողիկէ եկեղեցւոյ պատրիարք ընտրելու համար, որ կը փոխարինէ Մայիս 25-ին մահկանացուն կնքած Գրիգոր Պետրոս պատրիարքին։ «Արմէնփրէս»-ի հաղորդմամբ՝ ինչպէս կը հաղորդէ vaticannews-ը, այս մասին յայտնած է Հալէպի հայ կաթողիկներու առաջնորդ եւ Տանն Կիլիկիոյ հայոց պատրիարքութեան թափուր աթոռի կառավարիչ՝ Պետրոս Արքեպիսկոպոս Միրիաթեանը։
Նշուած է, որ Յունիս 22-ին հնարաւոր չէ եղած պատրիարք ընտրել, քանի որ թեկնածուներէն որեւէ մէկը չէ կրցած հաւաքել ձայներու երկու երրորդը, ինչպէս նախատեսուած է Արեւելեան եկեղեցիներու եկեղեցական կանոնադրութեան մէջ։
Պետրոս Արքեպիսկոպոս Միրիաթեանը յայտնած է, որ Հայ Կաթողիկէ եպիսկոպոսները պէտք է Սեպտեմբեր 20-ին հաւաքուին Հռոմի Լեւոնեան քահանայապետական վարժարանը, ուր Սեպտեմբեր 22-ին պէտք է սկսին ընտրութեան նիստերը, զորս պիտի նախագահէ Արեւելեան եկեղեցիներու ժողովներու կառավարիչ, կարտինալ՝ Լիոնարտօ Սանտրին։
