Հայաստանի արտաքին գործոց նախարարի պարտականութիւնները կատարող Արմէն Գրիգորեան այսօր՝ Օգոստոս 9-ին ընդունած է Հաւաքական անվտանգութեան պայմանագրի կազմակերպութեան գլխաւոր քարտուղար՝ Սթանիսլաւ Զասը։
Ըստ Հայաստանի արտաքին գործոց նախարարութեան՝ Արմէն Գրիգորեան ներկայացուցած է Զասին այն իրադրութիւնը, որ ստեղծուած է ատրպէյճանական Զինուած ուժերու Սիւնիքի եւ Գեղարքունիքի մարզեր ներթափանցման հետեւանքով, ինչպէս նաեւ Ատրպէյճանի պարբերական սադրանքները, անոնց կարգին՝ Նախիջեւանի տարածքէն։
ՀԱՊԿ-ի պատասխանատուութեան գօտիէն ներս անվտանգային եւ կովկասեան տարածաշրջանի իրավիճակի վերաբերեալ հայկական կողմի գնահատականներու ծիրէն ներս, Արմէն Գրիգորեան ուշադրութիւն հրաւիրած է Արցախի դէմ ատրպէյճանաթրքական յարձակողական հետեւանքներուն եւ անոնցմէ բխող սպառնալիքներուն։ Երկուստեք շեշտուած է իրավիճակի ապամագլցումի անհրաժեշտութիւնը։
Հանդիպման ընթացքին անդրադարձած են Լեռնային Ղարաբաղի հակամարտութեան եւ ընդգծած ԵԱՀԿ Մինսքի խումբի համանախագահութեան ծիրէն ներս արցախեան հիմնահարցի համապարփակ եւ տեւական կարգաւորման անհրաժեշտութիւնը։
Կողմերը անդրադարձած են նաեւ ՀԱՊԿ-ի Հայաստանի գալիք նախագահութեան։ Արմէն Գրիգորեան տեղեկացուցած է հայկական նախագահութեան հայեցակարգային մօտեցումներու մասին՝ շեշտելով, որ առաջնահերթութիւններէն են կազմակերպութեան արդիւնաւէտութեան բարձրացումը եւ անդամ պետութիւններու կարիքներուն ժամանակին արձագանքելու մեքենականութիւններու ամրապնդումը։
Սթանիսլաւ Զաս իր հերթին ընդգծած է ՀԱՊԿ-ի կատարելագործման կարեւորութիւնը եւ վստահեցուցած, որ ՀԱՊԿ-ի աշխատանքային մարմինները կը ներդնեն բոլոր ջանքերը հայկական կողմի յայտարարուելիք առաջնահերթութիւնները կեանքի կոչելու համար։