Ամենայն Հայոց Կաթողիկոս Գարեգին Բ-ն շնորհաւորական ուղերձ յղած է Նիկոլ Փաշինեանին՝ ՀՀ վարչապետ նշանակուելու կապակցութեամբ:
Ուղերձին մէջ, մասնաւորապէս, ըսուած է. «Մեծարգոյ վարչապետ, խորհրդարանական արտահերթ ընտրութիւնների արդիւնքում Հայաստանի Հանրապետութեան վարչապետի պատասխանատու պաշտօնում նշանակուելու առիթով յղում ենք Ձեզ արդիւնաւէտ աշխատանքի Մեր մաղթանքները:
Արցախեան 44-օրեայ պատերազմի հետեւանքով մեր ժողովրդի կեանքում եւ մեր երկրի շուրջ ստեղծուած իրավիճակն այսօր հրամայական է դարձնում ՀՀ սահմանների անվտանգութեան ապահովումը, Արցախի կարգավիճակի յստակեցումը եւ մեր հայրենիքում ընկերա-տնտեսական խնդիրների լուծումը: Առկայ մարտահրաւէրների յաղթահարման եւ հայրենական ապահով բարօր կեանքի կերտման աստուածահաճոյ ուղին ներքաղաքական լարուածութեան լիցքաթափումն է ազգային անդաստանում համերաշխութեան ու միաբանութեան մթնոլորտի հաստատումը»:
«Հայաստանեայց Առաքելական Սուրբ Եկեղեցին՝ հաւատարիմ իր կոչմանը, պիտի շարունակի իր աջակցութիւնը բերել մեր պետականութեան զօրացմանը՝ իր կարողութիւններն ի սպաս դնելով նաեւ հայրենիք-սփիւռք կապերի առաւել արդիւնաւորմանը, աշխարհասփիւռ մեր ժողովրդի ազգային ինքնութեան գիտակցութեան ամրապնդմանը եւ հոգեւոր կեանքի առաջընթացին», – ըսուած է ուղերձով:
