Կեանքէն հեռացած է ժամանակակից գրող, բանաստեղծ, արձակագիր, լրագրող՝ Արմէն Շեկոյեանը: «Արմէնփրէս»-ի հաղորդմամբ՝ այս մասին յայտնած են գրողներու միութենէն:
Արմէն Շեկոյեան ծնած է 1953 թուականի Մարտ 28-ին: 1974 թուականին աւարտած է Երեւանի Խաչատուր Աբովեանի անուան պետական մանկավարժական համալսարանի բանասիրական ֆակուլտետը: 1985 -ին հետեւած է Մոսկուայի Մաքսիմ Կորգիի անուան գրականութեան հիմնարկի գրական բարձրագոյն դասընթացներու։ Աշխատած է Երեւանի բժշկական հիմնարկի մէջ, իսկ 1976-1990 թուականներուն՝ «Ծիծեռնակ» ամսագրի մէջ, Գրական հիմնարկի «Սովետական գրող» հրատարակչութեան մէջ, ՀՀ մշակոյթի նախարարութեան մէջ: 1990-1992 թուականներուն եղած է «Նայիրի» հրատարակչութեան գլխաւոր խմբագիր, 1992-1997 թուականներուն եղած է Յովհ. Թումանեանի տուն-թանգարանի տնօրէնը։
Սիրուած են հեղինակի «Մետաքսի ճանապարհ», «Երեւան-հիւրանոց», «Անտիպոեզիա», «Թուղթ ու գիր», «Բախտ», «Ճոճք», «Ճամբորդ արեւը», «Անձրեւ, անձրեւ, մի արի» եւ այլ գրքերը:
