Միացեալ Նահանգներու պետական քարտուղարութիւնը իր աջակցութիւնը կը յայտնէ ԵԱՀԿ Մինսկի խումբի համանախագահութեան շրջանակէն ներս ղարաբաղեան հարցի խաղաղ կարգաւորման, «Ամերիկայի ձայն»-ի հայկական ծառայութեան հաղորդած են ԱՄՆ-ի պետական քարտուղարութենէն՝ աւելցնելով, որ ԱՄՆ-ը հաւատարիմ է կողմերուն օգնել, հասնիլ հակամարտութեան յարատեւ կարգաւորման, հիմնուելով Հելսինկեան եզրափակիչ աքթի` ուժի չկիրառման կամ ուժի սպառնալիքի չկիրառման, տարածքային ամբողջականութեան, հաւասար իրաւունքներու եւ ժողովուրդներու ինքնորոշման սկզբունքներու վրայ։
«Ամերիկայի ձայն»ը Պետական քարտուղարութեան հարց ուղղած է նաեւ Ուաշինկթընի մէջ կայացած ԱՄՆ-ի պետական քարտուղար՝ Պլինքընի ու Ֆրանսայի արտաքին գործոց նախարար Լը Տրիանի հանդիպման ժամանակ Լեռնային Ղարաբաղի կարգաւորման գործընթացի քննարկման մասին։ Պետական քարտուղարութենէն ի պատասխան մատնանշած են ֆրանսական կողմի տարածած տեղեկատուութիւնը, ըստ որու՝ Ուաշինկթընի մէջ Ֆրանսայի ու ԱՄՆ-ի դիւանագիտական գերատեսչութիւններու ղեկավարներու հանդիպման կողմերը, որպէս Մինսքի խումբի համանախագահողներ խօսած են համատեղ գործողութիւններու մասին, որոնք կ’օգնեն հասնելու կայուն խաղաղութեան Հայաստանի եւ Ատրպէյճանի միջեւ:
«Մեզ խորապէս կը մտահոգէ անցեալ աշնան Հայաստանի եւ Ատրպէյճանի միջեւ հակամարտութեան վերսկսման ազդեցութիւնը, յստակ կը գիտակցինք տարածաշրջանի մէջ առկայ մարդասիրական կարիքները», – նշած է Պետական քարտուղարութիւնը:
Ատրպէյճանի վերահսկողութեան տակ անցած Լեռնային Ղարաբաղի տարածքներ, անոնց կարգին՝ Շուշի, Ատրպէյճանի մէջ հաւատարմագրուած խումբ մը դեսպաններու ու դիւանագէտներու այցին չէին մասնակցած ԵԱՀԿ Մինսքի խումբի համանախագահող երեք երկիրներու՝ ԱՄՆ-ի, Ֆրանսայի ու Ռուսաստանի դեսպանները, ինչ որ Ատրպէյճանի մէջ «տեմարշ» որակուեցաւ։ ԱՄՆ-ի պետական քարտուղարութիւնը չէ մեկնաբանած, թր ի՞նչն է չմասնակցելու պատճառը, ու արդեօք համանախագահող երկիրներու միջեւ համաձայնութիւն եղա՞ծ է հրաւէրը մերժելու հարցով։
