Հայաստանի վարչապետի պաշտօնակատար՝ Նիկոլ Փաշինեան կառավարութենէն ներս հանդիպում ունեցած է Արցախի նախագահ՝ Արայիկ Յարութիւնեանի հետ: Այն առաջինն է արտահերթ խորհրդարանական ընտրութիւններէն եւ Նիկոլ Փաշինեանի՝ Յուլիս 7-ին Ռուսաստանի կատարած աշխատանքային այցէն յետոյ:
Վարչապետի աշխատակազմը տեղեկացուցած է, որ Նիկոլ Փաշինեան իր խօսքին մէջ նշած է. «Շատ կարեւոր եմ համարում ընդգծել, որ նաեւ նախընտրական շրջանում ես յստակ ձեւակերպել եմ 44-օրեայ պատերազմի բոլոր հանգամանքների մանրակրկիտ քննութիւնը, եւ կարեւոր է, որ կարողանանք ձեւակերպել այնպիսի ձեւաչափ ու այնպէս կազմակերպել աշխատանքը, որ այդ աշխատանքը լինի վստահելի, որովհետեւ շատ կարեւոր հարցերի պատասխաններ պէտք է ձեւակերպուեն»:
Փաշինեան ընդգծած է, որ 44-օրեայ պատերազմէն յետոյ բաւական լուրջ ջանքեր գործադրուած են Արցախի մէջ բնականոն կեանքը վերականգնելու համար:
Վարչապետի պաշտօնակատարը ընդգծած է նաեւ, որ օրակարգին վրայ «հարցերի հարցը շարունակում է մնալ Արցախի կարգավիճակի ճշգրտման խնդիրը»:
«Եւ պէտք է արձանագրենք, որ Նոյեմբեր 9-ից յետոյ ԵԱՀԿ Մինսքի խմբի համանախագահները հանդէս են եկել յայտարարութեամբ, ըստ էութեան, արձանագրելով այդ օրակարգը, որպէս աշխատանքային օրակարգ: Եւ մենք, պէտք է այստեղ նոյնպէս մեր անելիքները ճշգրտենք, նոր իրադրութեան մէջ փորձենք որոշակի ռազմավարութիւն որդեգրել եւ մեր նպատակներին հասնելու ուղիները մատնանշել», – ընդգծած է Փաշինեան:
Արցախի նախագահն ալ իր հերթին արձանագրած է,- «Այսօր ընկերային քաղաքականութիւնը թոյլ է տալիս վստահ յայտարարել, որ չկայ ընտանիք, որը չի եղել ուշադրութեան կեդրոնում, եւ միանշանակ այդ ամէնը միայն ու միայն Հայաստանի կառավարութեան կողմից յատկացուած գումարների շնորհիւ: Իսկ «Հայաստան» համահայկական հիմնադրամի հաւաքագրած գումարներն արդէն իսկ սկսել են ուղղուել բնակարանաշինութեանը եւ ենթակառուցուածքների զարգացմանը: Այսօր Արցախը մի մեծ շինհարթակ է: Ծրագրերը պէտք է շարունակել եւ առաջին հերթին՝ բնակարանաշինութիւնը, որը մեր գլխաւոր խնդիրն է: Այսօր Արցախում բնակարանների խնդիրն այնքան խիստ է, որ օրը մէկ բնակարան կառուցելն էլ քիչ է: Մեր ծրագրերն իրականացնելու համար պէտք է հասնենք նրան, որ առնուազն օրը մինչեւ 4-5 բնակարան կառուցենք: Այդ ծրագիրն ենք ուզում ներկայացնել հայութեանը, որպէսզի ամէն մի հայ առաջիկայ տարիներին մասնակցի բնակարանաշինութեան ծրագրերին», – աւելցուցած է Արցախի նախագահը:
Արայիկ Յարութիւնեան նաեւ ընդգծած է, որ Արցախի ամենակարեւոր խնդիրը անվտանգային, կարգավիճակի խնդիրն է:
«Եւ, բարեբախտաբար, կարգավիճակի առումով սկզբունքն ինչպիսին եղել է մինչ պատերազմը, ԵԱՀԿ Մինսքի խմբի կողմից օրակարգային փոփոխութիւն չի կրել: Մենք պէտք է ձգտենք, որ դա մնայ օրակարգում: Ձեր բոլոր յայտարարութիւնները, մեր յայտարարութիւնները, որ Արցախի անկախութեան ճանապարհը քննարկման ենթակայ չէ, վկայում է այն մասին, որ պէտք է շարունակենք մեր պայքարը: Իսկ անվտանգութեան առումով, ուզում եմ վստահեցնել, որ Պաշտպանութեան բանակի եւ խաղաղապահ ուժերի կողմից իրավիճակը համատեղ վերահսկւում է: Իրականում բարդ է աշխարհագրութիւնը, բայց, բարեբախտաբար, որեւէ լուրջ մտահոգող խնդիր չի եղել: Այսօր ընթանում է բերքահաւաք, որեւէ խնդիր կամ խոչընդոտ չկայ: Ընթանում են նաեւ ենթակառուցուածքների վերականգնման աշխատանքները հենց այսօրուայ շփման գծի երկայնքով», – ըսած է Յարութիւնեան:
