ՀՀ վարչապետի պաշտօնակատար՝ Նիկոլ Փաշինեան ուղերձ յղած է ՀՀ Սահմանադրութեան օրուայ առիթով․
«Սիրելի հայրենակիցներ, սիրելի ժողովուրդ,
շնորհաւորում եմ բոլորիս Յուլիսի 5-ի՝ Սահմանադրութեան օրուայ առիթով: 2021 թուականի Յուլիսի 5-ը դիմաւորում ենք կատարելապէս նոր պայմաններում՝ Հայաստանի Հանրապետութեան Սահմանադրութեան ոչ փոփոխելի 2-րդ յօդուածը լրումին հասած: Ըստ այդ յօդուածի՝ իշխանութիւնը Հայաստանի Հանրապետութիւնում պատկանում է ժողովրդին, եւ ժողովուրդն իր իշխանութիւնն իրականացնում է ազատ ընտրութիւնների միջոցով:
2021 թուականի Յունիսի 20-ի արտահերթ խորհրդարանական ընտրութիւններն ի ցոյց դրեցին, որ տասնամեակների պայքարից յետոյ սահմանադրական այս դրոյթը Հայաստանում հաստատուած է անշրջելիօրէն: Հայաստանի Հանրապետութեան իւրաքանչիւր քաղաքացի այսօր տեսնում է, գիտի, որ ինքը որոշիչ ուժ է, այնպէս, ինչպէս նախատեսուած է մեր երկրի Սահմանադրութեամբ:
Խորհրդարանական արտահերթ ընտրութիւնները, ըստ այդմ, ցոյց տուեցին, որ վերջին երեք տարիներին մեր սահմանադրական գիտակցութեան մէջ տեղի են ունեցել խորքային փոփոխութիւններ, եւ Երրորդ հանրապետութեան պատմութեան մէջ առաջին անգամ ընտրութիւնները դարձան ներքաղաքական ճգնաժամը յաղթահարելու եւ ոչ թէ ճգնաժամ յարուցելու միջոց: Սա սահմանադրական իրականութիւն ստեղծելու մեր առաքելութիւնը նոր թափով կեանքի կոչելու ամուր նախադրեալներ է ստեղծում:
Մեր առաջիկայ անելիքների առանցքը ձեւակերպուած է մեր երկրի Սահմանադրութեան նախաբանում եւ առաջին յօդուածում: Հայաստանի Հանրապետութեան ինքնիշխան, ժողովրդավարական, ընկերային, իրաւական պետութիւն լինելու նիւթականացման շուրջ պիտի համախմբենք մեր ազգային լաւագոյն ներուժը, եւ այդ համախմբումը պիտի տեղի ունենայ համաձայն ժողովրդի կամքի եւ ոչ թէ ի հեճուկս նրա:
Մեր առաջիկայ անելիքների առաջնահերթութիւնների շարքում արտաքին, սահմանադրական անվտանգութեան օրակարգերն են, այդ օրակարգերը սպասարկելուն կոչուած պետական հիմնարկների բարեփոխումը եւ կայացումը: Այս օրակարգերի պատշաճ սպասարկումն է, որ պիտի ապահովի մարդու, մարդկային ներուժի զարգացման համար անհրաժեշտ իրաւական, ընկերային, կրթական, ենթակառուցուածքային պայմանների հասանելիութիւնը, եւ այս օրակարգի վրայ պիտի աշխատենք օրնիբուն՝ մեր երկրի անվտանգութիւնն ու հզօրութիւնը, մարդու եւ քաղաքացու ազատութիւնը, երջանկութիւնն ու բարեկեցութիւնը որպէս նպատակ ունենալով:
Այս ընթացքում, ակնյայտօրէն, չի յաջողուի խուսափել մեր երկրի կառավարման համակարգի շուրջ քննարկումներից, բայց այս կարեւորագոյն հարցում էլ պիտի առաջնորդուենք «կտրելուց առաջ եօթ անգամ չափելու» սկզբունքով:
Սիրելի հայրենակիցներ, սիրելի ժողովուրդ,
խոնարհուելով յանուն հայրենիքի, յանուն ինքնիշխան պետութեան իրենց կեանքը զոհած մեր բոլոր եղբայրների ու քոյրերի յիշատակի առաջ՝ շնորհաւորում եմ բոլորիս Սահմանադրութեան օրուայ՝ Յուլիսի 5-ի առիթով»:
