Ռուսաստանէն առանձնայատուկ ուշադրութեամբ կը հետեւին Ատրպէյճանի տարածքին վրայ թրքական ռազմակայան տեղակայելու հնարաւորութեան, յայտարարած է Քրեմլինի խօսնակը։ Այդ առիթ կու տայ Մոսկուային քայլեր ձեռնարկելու սեփական անվտանգութիւն ապահովելու համար, ընդգծած է Տմիթրի Փեսքով։
Օրեր առաջ՝ այցելելով Պաքու, Թուրքիոյ նախագահ՝ Ռէճէպ Էրտողան յայտարարած էր, թէ չի բացառեր, որ Անքարան կրնայ ռազմական կայան ստեղծել Ատրպէյճանի տարածքին մէջ։
«Ցանկացած պարագային, ՆԱԹՕ-ի ռազմական ենթակառուցուածքներու տեղակայումը մեր սահմաններու մերձակայքը յատուկ ուշադրութեան առարկայ է մեզի համար, ինչպէս նաեւ առիթ կու տայ մեզի ձեռնարկելու քայլեր՝ մեր անվտանգութիւնն ու շահերը պաշտպանելու համար», – արձագանգելով Էրտողանի յայտարարութեան՝ ըսած է Վլատիմիր Փութինի խօսնակը։
Ռուսաստանը սերտ շփումներու մէջ է շահագրգիռ բոլոր կողմերուն հետ՝ Ղարաբաղի մէջ իրավիճակի կայունացման շուրջ, յայտարարած է Քրեմլինի խօսնակը։ Այս շարքին Տմիթրի Փեսքով յիշատակած է ոչ միայն Հայաստանն ու Ատրպէյճանը, այլեւ՝ Թուրքիան։
«Մենք սերտ կապի մէջ ենք Անքարայի, Պաքուի եւ Երեւանի հետ, եւ կը կարծենք, որ ցանկացած քայլ պէտք է նպաստէ Հարաւային Կովկասի մէջ իրավիճակի հետագայ կայունացման, ենթակառուցուածքներու զարգացման, փոխադրային լոկիստիկային, իրավիճակի հարթման ընդհանուր առմամբ, ու պէտք է բացառէ ինչ-ինչ տարրեր, որոնք կրնան առիթ դառնալ լարուածութեան աճի համար», – ըսած է Ռուսաստանի նախագահի խօսնակը։