Home ԳԼԽԱՒՈՐ ԼՈՒՐԵՐ Զոհերու Թիւը Այս Պահուն 3705 Է, Անյայտ Կորած 268 Մարդ Կայ. Փաշինեան

Զոհերու Թիւը Այս Պահուն 3705 Է, Անյայտ Կորած 268 Մարդ Կայ. Փաշինեան

by MassisPost

«Այս պահու դրութեամբ պատերազմի զոհերի թիւը 3 հազար 705 է, անյայտ կորած կամ գտնուելու վայրն անյայտ 268 մարդ կայ», Յունիս 17-ին, Հանրային հեռուստաընկերութեան նախընտրական բանավէճի ընթացքին յայտարարեց վարչապետի պաշտօնակատար, «Քաղաքացիական պայմանագիր» կուսակցութեան վարչապետի թեկնածու՝ Նիկոլ Փաշինեան։

Փաշինեանի խօսքով՝ հաստատուած գերիներու թիւը այս պահու դրութեամբ 60-ն է եւ ունին վարկած եւս 110 հոգիի գերեվարուած ըլլալու վերաբերեալ։

«Ուզում եմ ընդգծել, որ այս ընթացում վերադարձուել է 89 գերեվարուած անձ, որոնցից 6-ը գերեվարուած են եղել մինչեւ պատերազմը։ Ուզում եմ նաեւ ընդգծել, որ 94 թուից մինչեւ օրս Հայաստանում 395 մարդ անհետ կորած է համարւում», – ըսաւ Փաշինեան։

Օրերս Հայաստանի երրորդ նախագահ՝ Սերժ Սարգսեան Կոտայքի մարզին մէջ յայտարարեց, թէ Ապրիլին կառավարութեան զեկուցուած է, որ անհետ կորածներու թիւը 1064 է, իսկ Ազգային ժողովէն ներս յայտարարուած է 321 անհետ կորածի մասին։ Քննչական կոմիտէն ի պատասխան յայտնեց, որ անհետ կորած զինծառայողներու ու խաղաղ բնակիչներու թիւը 275 է։ Զինծառայողներու ապահովագրութեան հիմնադրամը յայտնեց, թէ անհետ կորածներու թիւը անընդհատ կը փոխուի։

Անդրադառնալով Ատրպէյճանին ականապատուած տարածքներու քարտէզները փոխանցելու հարցին Փաշինեան ըսաւ,- «Մեր ունեցած ականաքարտէզների ամբողջը չենք տուել, մի փոքր մասն ենք տուել միայն, եւ ոչ թէ փոխանակել ենք ականապատ դաշտերի քարտէզները գերիների հետ, այլ վերադարձի մարդասիրական քայլին պատասխանել ենք մարդասիրական քայլով, որովհետեւ դրանք այն ականները չեն, որ բաժանում են մեզ ատրպէյճանցիներից, այլ այն ականներն են, որ գտնւում են նրանց թիկունքում», – շեշտեց վարչապետի պաշտօնակատարը։

Նշենք, որ Յունիս 12-ին, Ատրպէյճանը Միացեալ Նահանգներու եւ Վրաստանի միջնորդութեամբ Հայաստանին վերադարձուց 15 ռազմագերիներ, երբ հայկական կողմը Պաքուին յանձնեց Աղդամի ականապատման քարտէզը։

Հարակից Նյութեր

Leave a Comment