Թուրքիոյ նախագահ Ռէճէպ Թայէպ Էրտողան ըսած է, որ Ռուսաստան դրական վերաբերմունք ունի «Զանգեզուրի միջանցքի» գաղափարի նկատմամբ: Ան ըսած է, թէ չի տեսներ որեւէ ազդակ, որ կը վկայէ այդ ծրագրի հանդէպ Ռուսաստանի բացասական դիրքորոշման մասին:
«Մենք «Զանգեզուրի միջանցքի» նախագիծը շատ կարեւոր կը համարենք, չեմ ենթադրեր, որ Ռուսաստանի մօտ կ’ըլլան այդ հարցի հետ կապուած ինչ որ տարաձայնութիւններ կամ ծրագիրը խոչընդոտելու մտադրութիւն: Ընդհակառակը, Ռուսաստանը շատ դրական է տրամադրուած միջանցքի հարցով», – ըսած է Էրտողանը թրքական NTV հեռատեսիլային կայանի թղթակիցի հետ զրոյցի ընթացքին:
Ան յայտնած է, որ առաջիկային Ատրպէյճանի նախագահ Իլհամ Ալիեւ պիտի բանակցի Ռուսաստանի նախագահ՝ Վլատիմիր Փութինի հետ:
«Ես ալ շուտով անոր [Վլատիմիր Փութինի] հետ պիտի հանդիպիմ: Կայ հանգամանք մը, հիմա մենք սահմանափակուած ենք [Լեռնային Ղարաբաղի հրադադարի հաստատման] պայմանագիրի հինգ տարուայ ժամկէտով: Եւ մենք կը ցանկանք այդ նախագիծը իրագործել այդ հնգամեայ ժամկէտով»,- ըսած է Էրտողան:
Թուրքիոյ ղեկավարը վերստին յիշեցուցած է Ղարաբաղի հարցով համագործակցութեան վեց պետութիւններու հարթակի գաղափարի մասին:
«Այդ ծրագրի առաջատար երկիրներն են Ռուսաստանը, Թուրքիան, Ատրպէյճանը եւ Իրանը, բայց մենք կը ցանկայիք, որ նախաձեռնութեան միանան նաեւ Հայաստանը եւ Վրաստանը»,- յայտարարած է Էրտողան, նշելով, որ Վրաստանը դրական վերաբերմունք ունի հարթակի հարցով: