Ամերիկայի Միացեալ Նահանգներու նախագահ՝ Ճօ Պայտընի կողմէ Հայոց ցեղասպանութեան ճանաչումէն ետք թրքական լիրան մօտեցած է մրցանշային ցած ցուցանիշի, ինչ որ աւելի վատթարացուցած է ԱՄՆ-ի եւ Թուրքիոյ երկկողմանի յարաբերութիւնները: «Արմէնփրէս»-ի հաղորդմամբ` այս մասին յայտնած է «Ahval news»-ը:
Լիրան անկում արձանագրած է 1,2 տոկոսով, հասնելով մէկ տոլարի դիմաց 8,48 լիրայի: Նոյեմբերին արձանագրուած ցուցանիշը 8,58 էր, իսկ վերջին շրջանին Թրքական լիրայի անկման հակամրցանիշ արձանագրուած էր Սեպտեմբեր 29-ին: Այդ օրը մէկ ամերիկեան տոլարի փոխարժէքը կազմած էր 7.83 թրքական լիրա:
Լրատուամիջոցը յայտնած է, որ ԱՄՆ-ի նախագահ՝ Ճօ Պայտընի կողմէ Հայոց ցեղասպանութեան ճանաչումը խնդիր դարձած է ՆԱԹՕ-ի անդամ երկու պետութիւններուն միջեւ: Թուրքիոյ Արտաքին գործոց նախարարութիւնը ետ կանչած է Ուաշինկթոնի մօտ իր դեսպանին խորհրդակցութիւններու նպատակով, իսկ նախագահ՝ Ռէճէպ Թայէպ Էրտողանի պաշտօնական ներկայացուցիչը յայտարարած է, որ պատասխան քաղաքական արձագանգը կ’ըլլայ մօտակայ ամիսներու ընթացքին:
Յօդուածը յիշեցուցած է նաեւ, որ ԱՄՆ-ը ու Թուրքիան խնդիր ունին նաեւ Անգարայի կողմէ Ռուսական C-400 հրթիռներու գնման հետ կապուած:
Թուրքիոյ իշխանութիւնները ուժեղացուցած են Անգարայի ԱՄՆ-ի դեսպանատան անվտանգութիւնը, այն բանէն յետոյ, երբ Միացեալ Նահանգներու նախագահ՝ Ճօ Պայտըն իր ուղերձով ճանչցաւ Հայոց ցեղասպանութիւնը:
Թուրքիոյ մօտ ԱՄՆ-ի դեսպանատունն ու հիւպատոսութիւնը յայտարարած են, որ անվտանգութեան նկատառումներէն ելլելով՝ պիտի փակեն Ապրիլ 26-ին եւ 27-ին, քանի որ բողոքի հաւաքներու հաւանականութիւն կայ:
Ոստիկանութեան աշխատակիցները ձգած են ԱՄՆ-ի դիւանագիտական առաքելութեան վարչական շէնքերու յարակից տարածքները: Լրատուամիջոցը յայտնած է, որ մինչեւ հիմա իրավիճակը հանդարտ է: