Ատրպէյճանի նախագահ՝ Իլհամ Ալիեւ կրկին յայտարարած է, թէ Պաքուն կը շարունակէ աշխատիլ «զանգեզուրեան փոխադրային միջանցքի ուղղութեամբ»։
«Ներկայիս մենք կ’աշխատինք «զանգեզուրեան փոխադրային միջանցքի» վրայ, որ պիտի դառնայ Արեւելք-Արեւմուտք միջանցքի մէկ մասը՝ Ասիան Եւրոպայի հետ միացնող։ Այդ միջանցքը թոյլ պիտի տայ ամրապնդել Ատրպէյճանի դիրքերը Եւրասիոյ կեդրոնը», – յայտարարած է Ալիեւ` գործընկեր երկիրները հրաւիրելով ուսումնասիրելու տարածաշրջանային այդ նախագիծի հեռանկարները։ Այս մասին Ատրպէյճանի առաջնորդը խօսած է ՄԱԿ-ի Ասիոյ եւ Խաղաղ ովկիանոսի տնտեսական եւ ընկերային յանձնաժողովի 77-րդ նիստի ընթացքին։
Յիշեցնենք, թէ անցեալ շաբաթ Ատրպէյճանի նախագահը վստահեցուցած էր, թէ պիտի կատարեն «զանգեզուրի միջանցքի իրագործման խնդիրը»՝ անկախ թէ Հայաստան ուզէ այդ, կամ՝ ոչ: Եթէ Հայաստանը ցանկայ, խնդիրը, ըստ Ալիեւի, կարելի է լուծել հեշտութեամբ, եթէ ոչ՝ իրենք «այն կը լուծեն ուժով»: Ան նաեւ յայտարարած էր, թէ «101 տարի անց ատրպէյճանական ժողովուրդը կը վերադառնայ զաւթուած Զանգեզուր»:
Հայաստանի վարչապետ՝ Նիկոլ Փաշինեան, անդրադառնալով այդ յայտարարութեան, հաւաստիացուցած էր, թէ Նոյեմբեր 9-ի յայտարարութեան մէջ ո՛չ Զանգեզուր, ո՛չ Սիւնիք, ո՛չ միջանցք արտայայտութիւնները կան, խօսքը տարածաշրջանային հաղորդակցութիւններու բացման մասին է։