Միացեալ Նահանգներու նախագահ Ճօ Պայտըն պաշտօնապէս ճանչցաւ Հայոց Ցեղասպանութիւնը եւ այդ բառերը երկու անգամ օգտագործեց Ապրիլ 24-ի իր պատգամին մէջ:
«Ամէն տարի այս օրը մենք կը յիշենք անոնց, որոնք զոհուեցան Օսմանեան ժամանակաշրջանի Հայոց Ցեղասպանութեան ընթացքին, եւ մենք պարտաւոր ենք կանխել նման չարագործութիւններու կրկնութիւնը», – ըսուած էր Սպիտակ Տան կողմէ հրապարակուած յայտարարութեան մէջ: Այսպիսով Պայտըն կը դառնայ Ամերիկայի առաջին նախագահը, որը 1915 թուականի մէկուկէս միլիոն հայերու կոտորածները կ՛անուանէ Ցեղասպանութիւն:
«1915 թուականի Ապրիլի 24-ին սկսած օսմանեան իշխանութիւններուն կողմէ Կոստանդնուպոլսոյ հայ մտաւորականութեան եւ համայնքի առաջնորդներու ձերբակալութիւններէն յետոյ, մէկուկէս միլիոն հայեր տեղահանուեցան, կոտորուեցան կամ մահուան ուղարկուեցան` բնաջնջման նպատակով: Մենք կ՛ոգեկոչենք Մեծ Եղեռնի զոհերը, որպէսզի նախկին սարսափները երբեք մոռացութեան մատնուած չըլլան պատմութեան համար: Եւ մենք կը յիշենք, որպէսզի մշտապէս զգօն մնանք ատելութեան կործանարար ազդեցութեան դէմ պայքարի ընթացքին՝ անոր բոլոր դրսեւորումներով», – կ՛աւելցնէ Միացեալ Նահանգներու 46-րդ նախագահը:
«Վերապրածներէն շատերը ստիպուած եղան նոր տուներ եւ նոր կեանք գտնել աշխարհի տարբեր կողմերը՝ անոնց շարքին Միացեալ Նահանգներու մէջ: Զօրութեամբ եւ տոկունութեամբ՝ հայ ժողովուրդը վերապրեցաւ եւ վերստին կառուցեց իր համայնքը: Տասնամեակներ շարունակ հայ գաղթականները հարստացուցած են Միացեալ Նահանգները տարբեր բնագաւառներէ ներս, բայց երբեք չեն մոռացած ողբերգական այն պատմութիւնը, որ իրենց նախնիներէն շատերը բերաւ դէպի մեր ափերը: Մենք կը յարգենք անոնց պատմութիւնը: Մենք կը տեսնենք այդ ցաւը: Մենք կը հաստատենք պատմութիւնը: Մենք այդ կ՛ընենք ոչ թէ մեղադրելու, այլ ապահովելու համար, որ կատարուածը այլեւս չկրկնուի», – կը շեշտէ նախագահը իր պատգամին մէջ:
«Այսօր, երբ մենք կ՛ողբանք մեր կորուստները, եկէք մեր հայեացքը յառենք ապագային եւ պատկերացնենք այն աշխարհը, որ կ՛ուզենք ստեղծել մեր երեխաներուն համար: Աշխարհ մը, որ աղտոտուած չէ մոլեռանդութեան եւ անհանդուրժողականութեան ամենօրեայ չարիքներով, աշխարհ, որտեղ մարդու իրաւունքները յարգուած են, եւ որտեղ բոլոր ժողովուրդները կրնան ապրիլ արժանապատիւ ու անվտանգ կեանքով: Եկէք վերահաստատենք ապագային վայրագութիւնները կանխելու մեր հաստատակամութիւնըª աշխարհի որ անկիւնն ալ ըլլայ: Եւ եկէք հասնինք աշխարհի բոլոր ժողովուրդներու հաշտեցման ու ցաւերու ամոքման:
«Ամերիկայի ժողովուրդը կ՛ոգեկոչէ բոլոր այն հայերուն, որոնք իրենց կեանքը կորսնցուցին 106 տարի առաջ այս օրը սկսած Ցեղասպանութեան հետեւանքով», – Կ՛ընդգծէ նախագահ Ճօ Պայտըն: