Հայ ռազմագերիներու, այլ գերեվարուածներու եւ տեղահանուած անձերու հարցի քննարկումը քուէարկութեամբ ներառուած է Եւրոպայի խորհուրդի Խորհրդարանական վեհաժողովի (ԵԽԽՎ) լիագումար նիստի օրակարգին վրայ։ Այս մասին դիմատետրով տեղեկացուցած է ԵԽԽՎ-ի Հայաստանի պատուիրակութեան ղեկավար՝ Ռուբէն Ռուբինեան, որու խօսքով՝ քննարկումը տեղի պիտի ունենայ վաղը՝ Ապրիլ 20-ին:
Այսօր աւելի վաղ, Հայաստանի մարդու իրաւունքներու պաշտպան՝ Արման Թաթոյեան տեղեկացուցած էր, որ Ատրպէյճան պահուող հայ գերիներու հարցով կրկին դիմած է միջազգային կառոյցներուն՝ անոնց կարգին ԵԱՀԿ գործող նախագահին, ԵԱՀԿ Մինսքի խումբի համանախագահներուն, Եւրոպական խորհուրդի եւ ՄԱԿ-ի մարդու իրաւունքներու յանձնակատարներուն։
Ընդհանուր առմամբ մինչ հիմա, Ատրպէյճանէն Հայաստան վերադարձուած է 69 գերի։ Իսկ Ատրպէյճան տեղափոխուած է 16 անձ, ներառեալ՝ 2014-ին Արցախի էջ երեխայի սպաննութեան ու այլ յանցագործութիւններու համար դատապարտուած՝ Շահպազ Կուլիեւն ու Տիլհամ Ասքերովը։
Պաշտօնական Պաքուն կը յայտարարէ, թէ գերիներու հարցը փակուած է, եւ Ատրպէյճան պահուող անձինք ռազմագերիներ չեն։
