Սահմանադրական կարգը տապալելու յատկանիշներով Մարտի սկիզբին Արցախի մէջ յարուցուած քրէական գործով առաջիկային հարցաքննութեան պիտի հրաւիրուի Արցախի նախագահ՝ Արայիկ Յարութիւնեան։ Այս մասին հաղորդած է Արցախի դատախազութիւնը՝ «հաշուի առնելով լրատուամիջոցներու պարբերական հարցումները»։
Չէ հաղորդուած թէ ինչ կարգավիճակով կ’անցնի Յարութիւնեան Արցախի Քրէական օրէնսգրքի 312-րդ յօդուածի 1-ին մասով նախատեսուած յանցագործութեան յատկանիշներով յարուցուած քրէական գործով: Դատախազութիւնը միայն կը խոստանայ հարցաքննութեան օրուայ մասին յայտնել լրացուցիչ։
Անցեալ ամսուայ սկիզբը, Արցախի դատախազութիւնը հաղորդած էր, որ քրէական գործ յարուցուած է Արցախ գործող հասարակական կազմակերպութիւններու կողմէ 2020 թուականի Դեկտեմբեր 12-ին ներկայացուած յանցագործութեան մասին համատեղ հաղորդման քննարկմամբ, եւ նախաքննութիւնը կը կատարուի յատուկ քննչական բաժնի քննիչներէն ձեւաւորուած խումբի կողմէ: Դատախազութիւնը վստահեցուցած էր, որ քրէական գործի մինչդատական վարոյթի ընթացքի ու արդիւնքներու վերաբերեալ կը տրամադրէ հանրութեան տեղեկատւութիւն պարբերաբար:
