Թուրքիա «Գաղտնի դիւանագիտութիւն» կը վարէ նախագահ Պայտընի «Հայոց Ցեղասպանութիւն» արտայայտութիւն օգտագործելու խնդրով
Թուրքիոյ նախագահ՝ Ռէճէպ Թայէպ Էրտողանի բամբեր համարուող թրքական «Sabah» թերթի կայքը կը տեղեկացնէ, որ Անգարան Ապրիլ 24-ի ընդառաջ գաղտնի դիւանագիտութիւն կը վարէ ԱՄՆ-ի հետ, քանի որ անհանգստացած է Ուաշինկթոնէն ստացուած ազդակներէն: Այս մասին կը յայտնէ Ermenihaber.am-ը։
Լուրեր կը շրջանառուին, որ ԱՄՆ-ի նախագահ՝ Ճօ Պայտըն մեծ հաւանականութեամբ Ապրիլ 24-ին կիրառէ Հայոց Ցեղասպանութիւն արտայայտութիւնը:
Ըստ թրքական կայքին՝ անցեալ շաբաթ Թուրքիոյ նախագահի մամլոյ խօսնակ՝ Իպրահիմ Քալըն հանդիպում ունեցած է ԱՄՆ-ի նախագահի անվտանգութեան հարցերով խորհրդական՝ Ճէյք Սալիվանի հետ եւ ներկայացուցած Հայոց Ցեղասպանութեան հարցով Թուրքիոյ 4 վերապահումները:
Ըստ Քալընի հաստատումներուն՝ կատարուածը ցեղասպանութիւն կոչելու համար իրաւական հիմք չկայ եւ անոր համար անհրաժեշտ է դատարանի որոշում, ինչպէս որ եղած են Ռուանտայի եւ Սրեպրենիցայի պարագաներուն:
Քալըն երկրորդ կէտով յիշեցուցած է Սալիվանին, որ «ցեղասպանութիւն» արտայայտութիւնը շրջանառութեան մէջ դրուած է 1948-ին:
Թուրքիոյ միւս մտավախութիւնը ներկայացուցած ատեն, Էրտողանի խօսնակը շեշտած է, որ Պայտընի կողմէ «ցեղասպանութիւն» բառի կիրառումը խնդիրներ կը ստեղծէ ԱՄՆ-Թուրքիա յարաբերութիւններուն մէջ:
Որպէսզի Միացեալ Նահանգները այդ քայլին չդիմէ, Թուրքիան պատրաստ է ամէն ինչի: Կայքի հաղորդմամբ, Քալըն յայտնելով, որ Կովկասի մէջ նոր կարգ կը հաստատուի, փոխանցած է հետեւեալ ուղերձը. «Մենք կ’ըսենք, թէ Հայաստանի հետ յարաբերութիւնները կարգաւորենք։ Կ’ըսենք. «եթէ անոնք (հայերը) ճիշդ քայլ առնեն, տեսէք մենք նոյնիսկ մեր դարպասները կը բանանք»: Այսպիսի ժամանակաշրջանի մը մէջ, եթէ դուք ցեղասպանութիւն բառը կիրառէք, կը նշանակէ, որ Կովկասի ամբողջ գործընթացը խափանելու կը նայիք»։
