Ռուսաստանի Դաշնութեան նախագահ՝ Վլատիմիր Փութինի եւ Հայաստանի Հանրապետութեան վարչապետ՝ Նիկոլ Փաշինեանի միջեւ հաղորդակցութիւնները պարբերական բնոյթ ունին: Ինչպէս հաղորդած է «ՌԻԱ Նովոսթի»-ն, այս մասին Մարտ 29-ին լրագրողներու հետ զրոյցի ընթացքին յայտարարած է ՌԴ նախագահի խօսնակ՝ Տմիթրի Փեսքով:
Փեսքով յայտնած է, որ երկու երկրի ղեկավարները «վերջերս խօսած են եւ հաղորդակցութիւններ պարբերաբար տեղի կ’ունենան»:
Փեսքով նաեւ ընդգծած է, որ Փաշինեանի Ապրիլ ամսուն հրաժարական տալու որոշումը որեւէ ձեւով ՌԴ նախագահի հետ հրատապ խօսելու անհրաժեշտութիւն չէ առաջացուցած: «Ան [Փաշինեան] կը մնայ [Հայաստանի վարչապետի] պաշտօնակատար, ուստի հրապարակուած որոշումը անյապաղ խօսելու անհրաժեշտութիւն չ’առաջացներ»,- ըսած է Քրեմլինի ներկայացուցիչը:
Յիշեցնենք, որ Մարտ 28-ին, Արմաւիր մարզի Արագած համայնքի բնակիչներուն հետ հանդիպման ժամանակ, վարչապետ Նիկոլ Փաշինեան յայտարարած էր, որ Ապրիլին հրաժարական պիտի տայ՝ արտահերթ խորհրդարանական ընտրութիւններ կատարելու նպատակով:
