Միացեալ Նահանգներու նախագահ՝ Ճօ Պայտընի ղեկավարութեամբ ԱՄՆ-ի վարչակազմը կը հաւատայ, որ կարեւոր է Հայոց ցեղասպանութեան հարցով ճանաչել պատմութիւնը: Ինչպէս կը հաղորդէ «Արմէնփրէս»-ը, այս մասին յունական Kathimerini-ին ըսած է Սպիտակ տան խօսնակը:
«Որպէս նախագահի թեկնածու՝ Պայտըն ոգեկոչած է 1.5 միլիոն հայ տղամարդոց, կանանց եւ երեխաներուն յիշատակը, որոնք մահացած էին Օսմանեան կայսրութեան վերջին տարիներուն: Ան այն ժամանակ ըսած էր, որ մենք երբեք պէտք չէ մոռնանք կամ լուռ մնանք այս սարսափելի փաստի առթիւ: Եւ մենք տեւական պիտի յարգենք այս մեծ ողբերգութենէն յետոյ հայ ժողովուրդի ցուցաբերած տոկունութիւնը: Այս վարչակազմը յանձնառու է առաջ մղել յարգանքը մարդու իրաւունքներու նկատմամբ, վստահեցնելու, որ նման կոտորածներ այլեւս չեն կրկնուիր: Այս ամէնուն կարեւոր բաղադրիչը պատմութեան ճանաչումն է»,- նշած է խօսնակը՝ Kathimerini-ի խնդրանքով արձագանգելով ԱՄՆ-ի ծերակուտական Ռոպըրթ Մենենտեսի կողմէն նախաձեռնուած նամակին, զոր ստորագրած էին 36 այլ դեմոկրատ եւ հանրապետական ծերակուտականներ:
Մենենտես նամակին մէջ Պայտընին յիշեցուցած է, որ նախապէս, այդ թուականին եւ 2020 թուականի նախընտրական քարոզարշաւի ծիրին մէջ ան ճանչցած է Հայոց Ցեղասպանութիւնը: Ծերակուտականը յիշեցուցած է, որ 2019-ի Դեկտեմբերին Միացեալ Նահանգներու Ծերակոյտը, իսկ 2020-ի Ապրիլին նաեւ Ներկայացուցիչներու պալատը ընդունած էին համապատասխան բանաձեւեր, որոնցմով 1915 թուականին կատարուածը կը ճանչնային որպէս Հայոց Ցեղասպանութիւն: Ան ընդգծած է, որ ժամանակն է, որ գործադիր մարմինը եւս ճանչնայ պատմական իրողութիւնը:
Սպիտակ տան խօսնակի մեկնաբանութենէն յետոյ քաղաքագէտ, քաղաքական խորհրդատուութիւն տրամադրող առաջատար Eurasia Group-ի եւ համաշխարհային յարաբերութիւններու լուսաբանումը կատարող GZERO Media-ի նախագահ՝ Եան Պրեմըր յայտարարած է, որ Սպիտակ տան իր աղբիւրը յայտնած է, որ Պայտընի վարչակազմը կը պատրաստուի 1915 թուականին Օսմանեան կայսրութեան հայերու կոտորածները ճանաչել որպէս ցեղասպանութիւն:
GZERO Media-յին մէջ հրապարակած բացառիկ տեսանիւթին մէջ, Պրեմըր անդրադառնալով Սպիտակ տան խօսնակի յայտարարութեան, պատմած է. «[Սպիտակ տան] խորհրդականներէն մէկը, իմ հարցին, թէ արդեօք կը հաստատէ, որ ցեղասպանութեան ճանաչում տեղի կ’ունենայ, ըսաւ ինծի, որ այդ այն է, ինչ ան (խմբ.- Ճօ Պայտըն) խոստացած է որպէս թեկնածու, եւ այդ քաղաքականութիւնը առաջ կ’երթայ: Սպիտակ տան մէկ այլ պաշտօնեայ, անդրադառնալով Ապրիլ 24-ին՝ Ցեղասպանութեան յիշատակի օրը կատարուելիք յայտարարութեան, ինծի ըսաւ, որ Պայտըն խօսքի մարդ է: Ուստի այս պահուն ակնյայտ է, որ ան պիտի ըլլայ առաջին ԱՄՆ-ի նախագահը, որ կ’ընէ այդ»:
Եան Պրեմըր նշած է, որ անկասկած Թուրքիոյ նախագահ՝ Ռէճէպ Թայէպ Էրտողանին ասիկա պարզապէս պիտի կատաղեցնէ: Ան յիշեցուցած է, որ ԱՄՆ-ի եւ Թուրքիոյ միջեւ յարաբերութիւնները առանց այն ալ վերջին շրջանին լաւ վիճակի մէջ չեն, մասնաւորապէս Անգարայի կողմէ ռուսական Ս-400 հակահրթիռային համակարգեր գնելու պատճառով: «Անկասկած, ցեղասպանութեան ճանաչումը շատ աւելի պիտի բարդացնէ վերականգնել թուրք-ամերիկեան յարաբերութիւնները: Անգարան ինքզինք աւելի մեկուսացուած պիտի զգայ, բացի այդ, անոնք հիմա հսկայական տնտեսական ճնշման տակ են»,- նշած է Պրեմըր:
