Քրտամէտ Ժողովուրդներու դեմոկրատական կուսակցութեան հայ պատգամաւոր՝ Կարօ Փայլանին Մարտ 16-ին թոյլ չեն տուած, որ մուտք գործէ Անգարայի Ուլուս թաղամասը գտնուող տարածքը, ուր Թուրքիոյ կառավարութեան բնակարանաշինութեան զարգացման վարչութիւնը (TOKİ) շինարարութիւն իրագործած է պատմական հայկական գերեզմանատան վրայ: Ինչպէս կը հաղորդէ «Արմէնփրէս»-ը, այս մասին յայտնած է Bianet-ը:
Առաջինը, Թուրքիոյ ճարտարապետներու պալատի Անգարայի մասնաճիւղն էր Մարտ 10-ին, ահազանգած այն մասին, որ մայրաքաղաքի պատմական Ուլուս թաղամասի մէջ խանութներ պիտի կառուցեն պատմական հայկական գերեզմանատան վրայ: Մասնաճիւղի տարածած հաղորդագրութեան մէջ մասնաւորապէս նշուած էր. «Գիտական աղբիւրներուն մէջ ըսուած է, որ այս տարածքը եղած է հայկական եւ կաթոլիկ գերեզմանատուն: Անօրինական փորման աշխատանքներու արդիւնքով յայտնաբերուած են մարդկային ոսկորներ, որոնք Անատոլական քաղաքակրթութիւններու թանգարանի կողմէն տարուած են ուսումնասիրման: Չնայած այս ամէնին՝ այս տարածքին վրայ շինարարութեան շարունակումը մեծ անարգանք է անատոլական հողերու բազմամշակութայնութեան նկատմամբ: Այս բարբարոսութիւն է, մարդու իրաւունքներու ոտնահարում»:
Թուրքիոյ խորհրդարանի հայ պատգամաւոր՝ Կարօ Փայլան հարցը բարձրացուցած էր մեջլիսին մէջ: Ան հարցում ըրած էր Շրջակայ միջավայրի եւ քաղաքաշինութեան նախարար՝ Մուրատ Քուրումին՝ նշելով, որ թէպէտ շինարարութեան ժամանակ այդ տարածքէն ներս յայտնաբերուած են մարդկային ոսկորներ, սակայն շինարարական աշխատանքները չեն կասեցուած: Պատգամաւորը հետաքրքրուած էր, թէ ինչու չի դադարեցուիր շինարարութիւնը, արդեօք TOKİ-ն տեղեակ է, որ այդպիսով կ’ոչնչացնէ Անգարայի մշակութային հարստութիւնն ու քաղաքային յիշողութիւնը, եւ ինչու պեթոն կը լեցուի հայերու ոսկորներու ու մշակութային հարստութեան վրայ: Նախարար՝ Մուրատ Քուրումը դեռեւս չէ արձագանգած Փայլանի հարցման:
Մարտ 16-ին, հայ պատգամաւորը Թուրքիոյ ճարտարապետներու պալատի Անգարայի մասնաճիւղի նախագահի եւ խումբ մը այլ անձանց հետ ցանկացած է տեղւոյն վրայ ծանօթանալ իրագործուող շինարարական աշխատանքներուն, սակայն անոնց թոյլ չեն տուած մուտք գործել տարածք: Փայլան ստիպուած եղած է արգելապատնէշներու մօտ հանդէս գալ յայտարարութեամբ՝ ըսելով. «Այս վայրը հայերու գերեզմանատունը եղած է: Այս հողերու վրայ ապրող հայերը արտաքսուած են այստեղէն: Անարգանքի ենթարկուած են ոչ միայն ապրողները, այլեւ մահացածները: Այստեղ ապրած հայ ժողովուրդը իր սիրելիները աղօթքներով թողած է հանգչելու այստեղ՝ շիրմաքարեր դնելով: Իսկ հիմա շիրիմներու վրայ պեթոն կը լեցուի: Ո՞ր խիղճը կարող է ընդունիլ այս»:
Զարմանք արտայայտելով այն փաստի առնչութեամբ, որ կ’արգիլուին մուտք գործել տարածք՝ Փայլան նշած է, որ այդտեղ անօրինական շինարարութիւն կ’իրագործուի, քանի որ չկան համապատասխան թոյլտուութիւններ: «Ես կը պահանջեմ, որ րոպէ առաջ կանգնեցուի այս անօրինական շինարարութիւնը, կասեցուի հայ ժողովուրդի շիրիմներուն պեթոն լեցնելը: Խորհրդարանը ու քաղաքացիական հասարակութիւնը եւ առաջին հերթին Անգարայի բնակչութիւնը պէտք է կանգնեցնեն հայկական գերեզմանի վրայ պեթոն լեցնելը: Անգարայի ժողովուրդը արժանի չէ նման անարգանքի»,- յայտարարած է Փայլան: