Պաշտօնական Պաքուն ՄԱԿ-ին յղած յատուկ նամակով կը պնդէ, որ հայկական կողմը Ատրպէյճանի սահմաններուն վրայ կը փորձէ հայկական զօրքեր տեղակայել։
«Հայաստանը, կոպիտ խախտելով 2020 թուականի Նոյեմբեր 10-ի եռակողմ համաձայնագիրը, «Լաչինի միջանցքով» գաղտնի կերպով Ատրպէյճանի տարածք ուղարկած է հայկական զինուած ուժերու կազմ՝ քաղաքացիական համազգեստով եւ քաղաքացիական փոխադրային միջոցներով, որպէսզի հնարաւոր ըլլայ խուսափիլ ռուսաստանեան խաղաղապահներու կողմէ կատարուող ստուգման գործընթացէն»,- ըսուած է Ատրպէյճանի արտաքին գործոց նախարար՝ ճէյհուն Պայրամովի նամակին մէջ` հասցէագրուած ՄԱԿ-ի Գլխաւոր վեհաժողովին եւ Անվտանգութեան խորհուրդին։
Ատրպէյճանի դիւանագիտութեան ղեկավարը շեշտած է, որ նման քայլերը կը տանին դէպի իրավիճակի ապակայունացման: