«Աւրորա» մարդասիրական նախաձեռնութիւնը կը յայտարարէ Արցախի օգնութեան ծրագրի հիմնովին նոր փուլ մը. այսուհետեւ անիկա կ’աջակցի այնպիսի նախագիծերու, որոնք կ’օժանդակեն եւ կը խթանեն ընկերային երկարաժամկէտ զարգացումը տարածաշրջանին մէջ: Պատերազմէն ետք, «Աւրորայի» կողմէ մեկնարկած ծրագիրը #AraratChallenge նախաձեռնութեան միջոցաւ՝ մարդասիրական անյապաղ օգնութիւն կը տրամադրէր արցախցիներուն: Անկէ զատ, «Աւրորայի» համահիմնադիրներ Նուպար Աֆէեանը, Վարդան Գրեգորեանը եւ Ռուբէն Վարդանեանը 1 միլիոն ԱՄՆ տոլար նուիրաբերեցին «Հայաստան» համահայկական հիմնադրամին՝ Արցախի օգնութեան ծրագիրներուն համար:
Այս նոր փուլով անցում կը կատարուի կայունութեան ուղղուած ծրագիրներուն, որոնք կ’ապահովեն երկարաժամկէտ ազդեցութիւն եւ կ’ընդգրկեն ֆինանսաւորման նախագիծեր, որոնք կ’աջակցին փոքր ձեռներէցութեան, ենթակառուցուածքներու վերականգնումին եւ կը խթանեն տնտեսութիւնը: Միեւնոյնատեն նախաձեռնութիւնը հաւատարիմ կը մնայ իր յանձնառութեան՝ պահպանելու եւ յառաջ մղելու հայկական ժառանգութիւնը տարածաշրջանին մէջ: Անիկա նաեւ պիտի շարունակէ աջակցիլ նախագիծերու, որոնք անմիջական օգնութիւն կը տրամադրեն Արցախի անապահով համայնքներուն:
«Հայաստանի եւ Ատրպէճանի միջեւ հրադադարի հաստատումէն ետք «Աւրորան» կարեւոր դերակատարում մը ունեցաւ՝ անյապաղ օգնութիւն տրամադրելով մարդասիրական լուրջ ճգնաժամի առջեւ կանգնած արցախահայութեան: Այսօր տեղւոյն վրայ անհրաժեշտ են ռազմավարական լուծումներ, եւ մենք ուրախ ենք ըլլալու առաջիններէն մէկը, որ օրակարգ կը վերադարձնէ երկարատեւ ընկերային զարգացումն ու կ’աջակցի նախագիծերու, որոնք կը նպաստեն զայն»,- ըսաւ «Աւրորայի» Արցախի ծրագրի ղեկավար Նարինէ Աղապալեանը:
Ըլլալով տարածաշրջանին մէջ մարդասիրական ոլորտի հիմնական առաջատարներէն՝ «Աւրորան» կը նախատեսէ համախմբել նախաձեռնութեան գործընկերները՝ բաժնեկցելու լաւագոյն փորձով՝ ապրիլին կազմակերպուող համաժողովին, ինչպէս նաեւ ներգրաւել փորձագէտները հայկական սփիւռքէն եւ նպաստել մարդասիրական հարթակի զարգացումը:
Արցախի մարդասիրական ծրագրի մեկնարկէն ի վեր՝ «Աւրորա» մարդասիրական նախաձեռնութիւնը արդէն ընդհանուր 581.740 ԱՄՆ տոլար (300.660.500 դրամ) յատկացուցած է՝ աջակցելով 57 տեղական եւ միջազգային նախագծի, որոնք ներկայացուած են ստորեւ: